Elordada toǵyzqumalaqtan «Abaı júldesi» respýblıkalyq týrnıri ótti
ASTANA. KAZINFORM – Astanada toǵyzqumalaqtan «Abaı júldesi» respýblıkalyq týrnıriniń fınaldyq kezeńi ótti. Saıys Parlament Senaty men Qazaqstan toǵyzqumalaq federatsııasynyń uıytqy bolýymen uıymdastyryldy. Jarystyń sheshýshi synyna óńirlik deńgeıdegi oıyndarda úzdik shyqqan 80 jeńimpaz qatysty. Olardyń qatarynda máslıhat depýtattary, BAQ ókilderi jáne memlekettik mekemelerdiń qyzmetkerleri bar.
Uıymdastyrýshylardyń aıtýynsha, týrnırdiń basty maqsaty – kóshpelilerdiń kóneden kele jatqan zııatkerlik oıynyn dáripteý. Sondaı-aq saıys Qazaqstanda máslıhattardyń qurylǵanyna 30 jyl tolýyna oraı jáne qyrkúıek aıynda elordada jalaýy jelbireıtin V Dúnıejúzilik kóshpendiler oıyndaryn qoldaý maqsatymen ótkizilgenin de aıta ketken abzal.
Іs-sharaǵa arnaıy baryp, fınaldyq oıyndarǵa qatysýshylarǵa sáttilik tilegen Senat depýtaty Gennadıı Shıpovskıh Palata Tóraǵasy Máýlen Áshimbaevtyń quttyqtaý hatyn oqyp berdi.
«Memleket basshysy Ulttyq quryltaıdyń otyrysynda tól qundylyqtarymyzdy dáripteý jáne tarıhı sanamyzdy jańǵyrtý máselesine basa mán berdi. Bul rette tereńnen tamyr tartatyn toǵyzqumalaq oıyny mańyzdy ról atqarady. Máslıhattardyń 30 jyldyǵy aıasynda Parlament Senaty men Toǵyzqumalaq federatsııasy birlesip uıymdastyrǵan saıys aldaǵy ýaqytta ıgi dástúrge aınalady dep senemin. Sheshýshi kezeńniń sanaýly kúnderden keıin bastalatyn V Dúnıejúzilik kóshpendiler oıyndarynyń qarsańynda ótkizilýiniń de sımvolıkalyq máni zor», - delingen jedelhatta.
Buǵan deıin bir jarym aı boıy elimizdiń 20 óńirinde, onyń ishinde shalǵaı eldimekenderde de irikteý týrnırleri ótkizilgen edi. Oblystardaǵy oıynshylardyń deńgeıin arttyrý maqsatymen sheberlik sabaqtary da uıymdastyryldy.
Tartysty ótken saıystyń nátıjesinde Batys Qazaqstan oblysynan kelgen qatysýshylar (Dýman Shanov, Ádilhan Naýryzbaı, Aıajan Birjanqyzy jáne Saıajan Birjanqyzy) jeńimpaz atandy. Ekinshi oryn Qyzylorda qalasynyń komandasyna (Berik Altynbekuly, Jandos Dosjan, Dıdar Sársen jáne Raıkúl Eshmuratova) buıyrdy. Al, úzdik úshtikti Pavlodar qalasynyń oıynshylary (Arystanbek Janbek, Jánibek Jumabaev, Meıir Nurjan jáne Larısa Rýbleva) túıindedi.
