Elordanyń joǵary bilikti dárigerleri óńirlerge kómek kórsetedi
NUR-SULTAN. QazAqparat – 2021 jylǵy 5 mamyr men 24 maýsym aralyǵynda elordadaǵy joǵary bilikti dárigerler óńirlerge saparmen baryp, jergilikti mamandarǵa tájirıbelik jáne ádistemelik-konsýltatsııalyq kómek kórsetedi, dep habarlaıdy QazAqparat tilshisi.
«UMC» korporatıvtik qorynyń málimetinshe, olar joǵary mamandandyrylǵan kómekke muqtaj naýqastardy qabyldaıdy. Sheberlik sabaqtaryn ótkizip, jergilikti emdeý mekemelerinde kúrdeli operatsııalar jasaıdy. Jalpy, is-sharanyń maqsaty – óńirlik densaýlyq saqtaý júıesin damytý arqyly otandyq medıtsınanyń sapasyn arttyrý jáne joǵary mamandandyrylǵan kómektiń turǵyndarǵa qoljetimdiligin arttyrý.
«UMC» KQ-nyń «Áıelder densaýlyǵy» departamentiniń dırektory, medıtsına ǵylymdarynyń doktory, profesor, akýsher-gınekolog Gaýrı Bapaeva, «Hırýrgııa» departamentiniń dırektory, medıtsına ǵylymdarynyń doktory, balalar hırýrgy Damır Djenalaev, Ortopedııa bóliminiń jetekshisi, medıtsına ǵylymdarynyń kandıdaty, shtattan tys bas balalar ortopedy Bolat Naǵymanov, Revmatologııa baǵdarlamasynyń jetekshisi, medıtsına ǵylymdarynyń kandıdaty, pedıatr Maıkesh Asylbekova, onkogematologııa baǵytynyń jetekshisi, medıtsına ǵylymdarynyń kandıdaty, onkolog Zabıra Qyzdarbekova sııaqty joǵary bilikti mamandar kiretin «UMC» KQ-nyń alǵashqy dárigerler toby 2021 jylǵy 5 mamyrda Nur-Sultan qalasynda naýqastardy qabyldaıdy.
Ary qaraı óz salasynyń maıtalman mamandarynan jasaqtalatyn «UMC» KQ dárigerler toby mamyrdyń 12-14 kúnderi Atyraý oblysyna, 19-21 mamyrda Aqtóbe oblysyna, 26-28 mamyr kúnderi Mańǵystaý oblysyna, maýsym aıynyń 1-3 kúnderi Aqmola oblysyna, 2-4 maýsymda Batys Qazaqstan oblysyna, 8-10 maýsymda Pavlodar oblysyna, maýsymnyń 9-11 kúnderi Soltústik Qazaqstan oblysyna, 16-18 maýsym kúnderi Qostanaı oblysyna, 23-24 maýsymda Túrkistan oblysy men Shymkent qalalaryna barady.
Osyndaı saparlardyń nátıjesinde óńirlik dárigerler óz salalary boıynsha ozyq tehnologııalardy meńgerip, túrli aýrýlarǵa qarsy kúresti tıimdi júrgizip, turǵyndarǵa kórsetiletin medıtsınalyq kómektiń sapasy men qoljetimdiligi arta túsedi.
