Elordanyń «Jeleznodorojnyı» turǵyn úı alabyna emhana salynbaq
NUR-SULTAN. QazAqparat - Elordanyń «Jeleznodorojnyı» turǵyn úı alabyna emhana salý qajet. Mundaı usynysty Almaty aýdany ákiminiń orynbasary Bekjan Bapyshev jasady, dep habarlaıdy QazAqparat tilshisi.
«Búgingi kúni Almaty aýdanynda 6 turǵyn úı alaby ornalasqan. Olar: Promyshlennyı, Jeleznodorojnyı, Internatsıonalnyı, Mıchýrıno, Kúıgenjar jáne Ońtústik-Shyǵys. Jalpy aýmaǵy 1 400 gektardy quraıtyn bul alaptarda 95 myń adam turady. Bilim berý salasyna qatysty aıtar bolsam, turǵyn úı alabtarynda 13 bala baqsha men 12 mektep jumys isteıdi. Ótken jyly Promyshlennyıdaǵy №57 mektepke 300 orynǵa arnalǵan japsarlas ǵımarat salyndy. Bıyl Mıchýrınoda 600 orynǵa arnalǵan mektep paıdalanýǵa berildi. Jeleznodorojnyıda Іshki ister mınıstrliginiń oqý ortalyǵy ǵımaratyn qalanyń kommýnaldyq menshigine qaıtarý jumstary uıymdastyryldy. Onda №50 balabaqshanyń 140 orynǵa arnalǵan ekinshi korpýsy men tehnıkalyq shyǵarmashylyq ortalyǵy ashyldy», - dedi Berik Bapyshev Nur-Sultan qalasy qoǵamdyq keńesiniń otyrysynda.
Onyń atap ótýinshe, aýdanda qalalyq 5 emhananyń fılıaly medıtsınalyq qyzmet kórsetedi. Jeleznodorojnyı turǵyn úı alabynda turǵyndardyń ótinishi boıynsha jeketulǵalar jalǵa alyp otyrǵan ǵımaratty bosatý esebinen emhanaǵa keńeıtý júrgizildi. 1979 jyly salyǵan ǵımarattyń búgingi jaı-kúıi óte nashar. Emhana qyzmetkerleri men kelýshiler tarapynan ǵımarattyń qys ýaqytynda salqyn bolatyndyǵyna qatystyshaǵym kóp.
Osyǵan oraı Almaty aýdany ákiminiń orynbasary emhanaǵa arnalǵan jańa ǵımarat salý ne bolmasa jumys istep turǵan emhanaǵa kúrdeli jóndeý jumystaryn júrgizý qajettigin basa aıtty. Sonymen qatar ol qoǵamdyq keńes múshelerinen osy bastamaǵa qoldaý kórsetýdi ótindi.
