Elordanyń jedel járdem qyzmeti jetildirilip, túnde qyzmet isteıtin aq halattylardyń balalary balabaqshamen qamtylmaq
ASTANA. QazAqparat - Jaqyn arada Astana qalasynda zamanaýı jedel medıtsınalyq járdem qyzmetin qurý týraly keshendi jospar qurylmaq. Qazirgi jedel medıtsınalyq járdem qyzmeti astanalarǵa tán talaptarǵa saı emes jáne ol jańǵyrtýdy qajet etedi. Bul týraly qalalyq ákimdikte ótken apparat keńesinde Ádilbek Jaqsybekov málimdedi, dep jazady Astana qalasy ákimdiginiń resmı saıty.
«Bizdiń barlyǵymyz medıtsınalyq jedel járdem qyzmeti jumysynyń durys uıymdastyrylmaǵany sebepti zardap shegip kelemiz nemese zardap shegýimiz múmkin. Dál qazir buǵan basqasha qyrynan qaraý kerek», - deı kele, elorda basshysy atalǵan jumysqa qatysy bar barlyq basqarmany jumylýǵa shaqyrdy.
Keshendi jospar jańa jedel medıtsınalyq kómek qyzmetin jańasha keıipte kórsetedi jáne ol Qazaqstan astanasynyń joǵary standarttaryna saı bolmaq.
Sondaı-aq josparda ınfraqurylym, tehnıkalyq jabdyqtaý, kólikpen qamtamasyz etý, kadrlyq qurylym jáne osy qyzmettegi mamandardyń turǵyn úımen qamtylýy máseleleri qarastyrylady. Budan ózge, eń basty nazar shuǵyl túrde oqıǵa ornyna jóneltilgen kólik qozǵalysyn jáne aýlaishilik alańdarǵa kiretin joldardaǵy qozǵalys júıesi jeńildetýge baǵyttalǵan. Sonymen qatar jedel járdem qyzmetinde túngi ýaqytta jumys isteıtin qyzmetkerlerdiń balalaryna arnalǵan balabaqsha uıymdarynyń máselesi sheshimin tappaq.
Apparat keńesinde temirjol vokzaly jumysy sóz boldy. Jańa temirjol vokzalynyń qurylysyna baılanysty eski vokzal da kózden tasa qalmaý kerektigi aıtyldy. Á.Jaqsybekov óz sózinde vokzaldyń jaǵdaıy Astananyń deńgeıimen sáıkes bolýy shart, sonymen birge qyzmet sapasy men vokzal mańyndaǵy aqyly kólik turaǵyna da nazar aýdarý kerek ekendigin atap ótti.
Apta saıyn ákimdikte ótetin apparat keńesinde azamattardyń ótinishteri boıynsha máseleler qaralady. Sonyń biri qaladaǵy ınternet sapasyna sońǵy ýaqytta shaǵymdar jıi aıtylýda. Sıgnal men jyldamdyqtyń nasharlaýy, úzilýi turǵyndardyń narazylyǵyn týdyrýda. Bir aptanyń ishinde «Astanatelekom» usynyp otyrǵan qyzmetke taldaý jasalyp, kelesi apparat keńesinde qaralatyn boldy.
