Elordanyń «jasyl beldeýine» 4,5 mln aǵash otyrǵyzylady
NUR-SULTAN. QazAqparat – Nur-Sultan qalasynyń «jasyl beldeýine» 4,5 mln aǵash otyrǵyzylady. Bul týraly qalalyq qorshaǵan ortany qorǵaý jáne tabıǵat paıdalaný basqarmasynyń basshysy Álııa Qojabaeva aıtyp berdi, dep habarlaıdy QazAqparat.
Onyń aıtýynsha, qoldanystaǵy zańnamaǵa sáıkes, elorda jaǵdaıyna arnalǵan «jasyl» aımaqtyń kólemi myń adamǵa 25 gektar nemese bir turǵynǵa shaqqanda 250 sharshy metrdi quraýy tıis.
Qazirgi ýaqytta «jasyl beldeý» mólsheri - bir turǵynǵa 139 sharshy metrdi qurap otyr. Osy erejege sáıkes, Nur-Sultannyń «Jasyl beldeýi» ormany keminde 25 myń gektar bolýy kerek.
Búgingi tańda qalany úzdiksiz kógaldandyrýdyń jalpy aýdany 14 725 gektarǵa jetken jáne bıyl 4,5 mln aǵash otyrǵyzý josparlanǵan. Qazirgi ýaqytta merdiger uıymdy anyqtaý boıynsha konkýrstyq rásimder júrgizilip jatyr. Qala sheginde jer telimderi bólindi, biraq spıkerdiń aıtýynsha, olardyń barlyǵy aǵash otyrǵyzýǵa jaramdy bola bermeıdi.
«Elordada aǵashtardyń jersiný deńgeıi 61%-ti quraıdy. Al «Jasyl beldeýdegi» aǵashtar 91% deıin jersinedi.(...) Biz qazir zertteýge tapsyrys berip, ǵylymdy, bıologtardy, topyraqtanýshylardy jáne basqa da qyzyǵýshylyq tanytqan tulǵalardy tartqymyz keledi jáne ne qolaıly, ne joq ekenin kórgimiz keledi. Eger jerler jaramsyz bolyp shyqsa, bul ýchaskelerden bas tartyp, basqalaryna aýystyrýdy suraımyz», - dedi ol qalalyq máslıhattaǵy eseptik kezdesýde.
Buǵan deıin Álııa Qojabaeva Nur-Sultannyń qaı aýdandarynda jańa saıabaqtar salynatynyn aıtqan edi.
