Elordanyń jasyl beldeýi 30 myń gektarǵa deıin ulǵaıady

Bas qalanyń jasyl jelegin jaıqaltý isi 2021 jyly jańasha serpin almaq. Qazir jobalaý jumystary júrip jatyr. Budan 20 jyl buryn elordanyń irgesine egilgen tal-shybyqtar qazir záýlim aǵashqa aınaldy. Jalpy aýmaǵy 15 myń gektar jasyl beldeý keleshekte eki ese ulǵaıýy tıis. Qazir orman arasy jas shybyqtarmen tolyǵyp jatyr. Bıyldyń ózinde 511 myń túp tal otyrǵyzyldy. Qaıyń-qaraǵaıy jaıqalyp turǵan ormanda shyrsha, emen, úıeńki syndy aǵashtardyń 36 túri ósedi. Arasynda qaraqat, shıe tárizdi jemis-jıdekter de bar.

«Shilde-maýsym aılarynda biz ormandy zııankesterden qorǵasaq, qazir dala órtinen qorǵaý jumystaryn júrgizip jatyrmyz. Bizde Nur-Sultan qalasynyń jasyl beldeýi boıynsha 6 post ornalastyrylǵan. Onda 40 adam jáne 6 sý tasıtyn mashınalar táýlik boıy jumys atqarady. Endi ǵana eńse tiktep kele jatqan tal-terekterge erekshe kútim qajet. Bıyl jaýyn-shashyn mólsheri az bolǵandyqtan, jumysshylar tynymsyz ter tógýge májbúr. Esesine bul bas qalaǵa jaqyn aýyl turǵyndary úshin eki qolǵa bir kúrek. Tańnyń atysy, kúnniń batysy 900-deı eńbekker aǵashtardy sýaryp, orman alqabyn kórkeıtýge úles qosady»,-deıdi «Astana ormany» mekemesiniń bas agronomy Ardaq Hasenov.

Al osyndaǵy jumysshylardyń biri Dámetaı óziniń Orazaq aýylynyń turǵyny ekenin elorda ormanynda birneshe jyldan beri jumys isteıtinin aıtady.

«Ýaqytynda kelip ketemiz. Aılyq jaqsy, aı saıyn berip turady. Osy taldardy egip, shyrsha, kúlán aǵashtaryn egip, jaqsy ósip tursa, óte qýanamyz»,-deıdi ol.

Elordadaǵy jasyl beldeý aýmaǵy 30 myń gektarǵa jetse, 1 mıllıonnan astam turǵyny bar bas qala úshin ekologııalyq ahýal da jaqsarady.

Sonda ǵana árbir turǵynǵa 250 sharshy metr orman alqaby tıesili bolyp, halyqaralyq talaptarǵa tolyq sáıkes kelmek. Qazirdiń ózinde, Arqanyń ańyzaǵy azaıǵany anyq baıqalady. Bul osy baǵyttaǵy jumystardyń ıgi nátıjesi.