Elordanyń jańa jumys kestesiniń nátıjesi taıaý kúnderi jarııalanady
ASTANA. QazAqparat - Elordanyń jańa jumys ýaqyty kestesine kóshýine baılanysty osy ózgeristiń nátıjesi taıaý ýaqytta belgili bolady.
Bul týraly QazAqparat tilshisine Astana qalalyq Іshki ister departamenti baspasóz qyzmetiniń jetekshisi Sofıa Qylyshbekova habarlady.
«Búgin birinshi kún bolǵandyqtan, barlyq derekterdi zerdelep jatyrmyz. Osy oraıda qaı kóshelerde kólik aǵyny qandaı kólemde bolǵanyna monıtorıng júrgizilýde. Atap aıtqanda, búginde elordadaǵy birqatar kóshelerde jol jóndeý jumystary júrip jatqandyǵyn eskerep otyryp, keıbir jerlerde keptelis boldy. Ózderińiz bilesizder, 1 maýsym halyqaralyq balalardy qorǵaý kúnine oraı túrli sharalar uıymdastyrylyp jatyr. Keıbir alańdar men kóshelerde jartylaı shekteýler qoıylǵan. Árıne, osyndaı jerlerde kólik qozǵalysy birshama qıyndaıdy. Sonymen qatar ata-analardyń kóbisi jumystarynan suranyp, balalarymen birge serýenge shyǵýda, saıabaqtarǵa qaraı barýda. Sondyqtan qala kóshesinde kólik kóp bolatyny anyq. Bul rette eki-úsh kún monıtorıng jasap qaraǵannan keıin, naqty aqparatty habarlaımyz»,-dep atap ótti Sofıa Qylyshbekova.
Budan buryn habarlanǵandaı , elorda 1 maýsymnan bastap jańa jumys ýaqyty kestesine kóshti. Osyǵan oraı jumys ýaqytyn saralaý tıisti ekonomıkalyq sanattarǵa qaraı bólindi. Shara EKSPO qarsańynda elorda joldarynyń júktemesin azaıtý úshin engiziledi.
Bul turǵyda mamyr aıynyń basynda Astana qalalyq jolaýshylar kóligi basqarmasynyń bastyǵy Bekmyrza Igenberdınov quqyq qorǵaý organdarynyń, medıtsına, bilim berý uıymdarynyń, balabaqsha, mektepterdiń jumys ýaqyty burynǵysha qaldyrylatynyn aıtqan edi.
«Qurylys uıymdarynyń jumys ýaqytyn saǵat 9-dan 7-ge, qalanyń kommýnaldyq qyzmetteri men ónerkásiptik jáne óndiristik sektorlaryn 9-dan 7-30-ǵa, halyqqa qyzmet kórsetý ortalyqtary men qarjy ınstıtýttaryn 9-dan 10-ǵa, saýda, oıyn-saýyq uıymdaryn 10-nan 10-30-ǵa, ulttyq kompanııalardy 9-dan 9-30-ǵa aýystyrý usynylady», - dedi Igenberdınov.
Sonymen qatar ol respýblııkalyq basqarý organdarynyń, jergilikti atqarýshy organdardyń jumys ýaqytyn saǵat 9-dan 8-30-ǵa, al joǵary oqý oryndary men mamandandyrylǵan oqý oryndarynyń jumys ýaqyty 9-den 10-ǵa aýystyrylatyndyǵyn basa aıtty.
