Elordanyń jańa ataýyn túrkistandyqtar qyzý qoldady
TÚRKІSTAN. QazAqparat - Búgin Túrkistan qalasynda Astananyń Nur-Sultan dep ózgerýine baılanysty merekelik kesh ótti. Esim han alańyna jınalǵan 10 myńdaı kórermen elimizge belgili estrada juldyzdary - «Jigitter» kvarteti men Ernar Aıdar, Dıma men Dana, Aınur Nurasheva, Nurjan Júsipbekov syndy ónerpazdardyń kontserttik baǵdarlamasyn tamashalady, dep habarlaıdy QazAqparat tilshisi.
Estrada juldyzdary ánnen shashý shashyp, jurtshylyqqa kóterińki kóńil-kúı syılady. Keshke jınalǵan kópshilik qaýym elordanyń aty ózgergenine, Elbasynyń esimi ulyqtalǵanyna rızashylyqtaryn bildirdi.
Oblystyq aqsaqaldar alqasynyń tóraǵasy Jarylqasyn Áziretbergenuly Uly dalanyń kindiginde ornalasqan, Elbasynyń bastamasymen salynǵan Astanaǵa Nursultan Ábishuly Nazarbaevtyń esimin berip, tarıhı tulǵa mártebesin asqaqtatqan tarıhı sheshimdi Túrkistan oblysynyń halqy da qoldaıtynyn jetkizdi.
Sondaı-aq aıtysker aqyn, respýblıkalyq, halyqaralyq aqyndar aıtysynyń júldegeri, «Daryn» jastar syılyǵynyń ıegeri Birjan Baıtýov ta óleńmen órilgen quttyqtaýyn joldady.
«Іrgesi bekip, abyroıy asqaqtaǵan Qazaq eliniń óz kóshbasshysyn ulyqtap, eren eńbegin baǵalaǵany ańǵarylady. Barsha túrkistandyqtardy tarıhı sheshim, tarıhı kúnmen quttyqtaımyn!»,-dedi Birjan Baıtýov.
Án keshine jıylǵan jurtshylyq «Elimiz aman, azat halqymyz máńgi jasasyn» dep tarqasty.
