Elordanyń jańa ákimshilik ortalyǵy avtoturaqtarmen qamtamasyz etiledi
ASTANA. 19 qazan. QazAqparat -Astana qalasynyń ákimdigi táýliktiń mezgiline baılanysty avtokólikterdiń jınalyp qalatyn problemalyq aımaqtarynyń tizimin anyqtady.
Olardyń ishinde túngi ýaqytta - 7 iri aımaq, sondaı-aq kúndizgi ýaqytta - 24 jergilikti aımaq bar. Elordanyń resmı saıtynyń málimetinshe, osyǵan oraı, avtoturaq jetispeýshiligi kúndizgi ýaqytta -12,7 myń oryndy, al túngi ýaqytta - 48,9 myń oryndy quraıdy.
«Osy atalǵan máselelerdi sheshý maqsatynda qalanyń jańa ákimshilik ortalyǵynda jalpy syıymdylyǵy 4950 oryn bolatyn 10 parkıng salý josparlanýda», - dep habarlaıdy Astana qalasynyń Jolaýshylar kóligi jáne avtomobıl joldary basqarmasy.
Taıaý ýaqytta Dostyq kóshesi boıyndaǵy Qorǵanys mınıstrligi mańynda parkıngtiń qurylysyn bastaý kózdelýde.
Sondaı-aq, aqyly avtoturaqtar júıesi Jobasy da ázirlenýde.
