Elordanyń úzdik muǵalimderi 1 mln teńgeden syılyq aldy
NUR-SULTAN. QazAqparat – «Nur-Sultan qalasynyń qurmetti pedagogy» atanǵan muǵalimder 1 mln teńge kóleminde aqshalaı syılyqtarmen marapattaldy. Bul týraly elorda ákimi Altaı Kólginov áleýmettik jelidegi paraqshasynda jazdy, dep habarlaıdy QazAqparat.
Altaı Kólginov elordanyń úzdik muǵalimderimen kezdesip, olardy kásibı merekesimen quttyqtady.
«El basshylyǵy muǵalimderdiń jaǵdaıyn jasaýǵa jáne olardy qoldaýǵa erekshe kóńil bóledi: 2024 jylǵa deıin jyl saıyn pedagogterdiń jalaqysy 25%-ǵa artyp, biliktilikti arttyrý boıynsha baǵdarlamalar engizildi, sol sııaqty joǵary oqý oryndaryna granttar bólindi. Buǵan qosa qolaıly jumys isteý jáne oqýshy oryndarymen qamtamasyz etý úshin jyl saıyn oqý oryndary salynyp jatyr. Bıyl 15 mektep salynyp, paıdalanýǵa beriledi. Bul shamamen 40 myń oqýshy ornyn qurýǵa múmkindik beredi. Salystyrar bolsaq 2020 jyldan eki ese, 2019 jyldan tórt ese kóp» - dedi ákim jelide.
Sondaı-aq ol ustazdarǵa arnap áleýmettik turǵyn úı salyp, turǵyn úı sertıfıkattar berilip jatqanyn tilge tıek etti.
«Búgin «Nur-Sultan qalasynyń qurmetti pedagogy» atanǵan muǵalimder 1 mln teńge kóleminde aqshalaı syılyqtarmen marapattaldy. Bul aqshalaı marapat ótken jyldan bastap engizildi. Sondaı-aq «Qazaqstan Respýblıkasy bilim berý isiniń qurmetti qyzmetkeri» jáne QR BǴM «Y.Altynsarın» tósbelgileri, dıplomdar berildi. Al №7 «Aqqý» balabaqshasyna, №85 mektep-lıtseıine jáne Astana Polytechnic joǵary kolledjine 7 mln teńgeden granttar berildi», - dep toyqtyrdy ol.
