Elordanyń úzdik dárigerleri marapattaldy
NUR-SULTAN. QazAqparat - Beıbitshilik jáne kelisim saraıynda ІІ «ALTYN SHIPAGER» syılyǵynyń jeńimpazdary marapattaldy, dep habarlaıdy QazAqparat tilshisi.
Jeńimpazdar 15 myń ótinim arasynan tańdap alyndy. Onda dárigerdiń qyzmeti, jumys ótili men kásibıligi eskerildi. Olardy ádil irikteý maqsatynda arnaıy komıssııa quryldy, komıssııa quramyna medıtsına salasyndaǵy tájirıbeli mamandar kirdi.
Nátıjesinde biliktiligimen jáne kásibıligimen kózge túsken medıtsına mamandary «Jyl dárigeri», «Úzdik epıdemıolog», «Mamandyǵyna adaldyq», «Tsıfrlandyrý kóshbasshysy», «Densaýlyq saqtaý isiniń úzdik menedjeri», «Biregeı ota jasaǵany úshin», «Úzdik jedel-járdem brıgadasy» syndy 11 atalym boıynsha marapattaldy.
Saltanatty rásim QR Densaýlyq mınıstri Eljan Birtanovtyń quttyqtaý sózi men birinshi nomınatsııany tabystaýdan bastaldy. Mınıstr «Eń úzdik jas ýchaskelik dáriger» nomınatsııasynda jeńip alǵan jeńimpazdy - «Nıet» otbasylyq densaýlyq saqtaý ortalyǵynyń jalpy tájirıbelik dárigeri Saltanat Takeevaǵa «Altyn shıpager» músinshesi men 1 mln teńge qarjylaı sertıfıkatty tabystady.
Al №2 Perınataldy ortalyǵynyń medbıkesi Meńsulý Ámirova «Eń úzdik orta medıtsınalyq qyzmetker» nomınatsııasynyń jeńimpazy atandy.
«Patsıentke baǵyttalǵan eń úzdik medıtsınalyq uıym» atty ekinshi nomınatsııany Qalalyq №10 emhanasy jeńip aldy.
«Densaýlyq saqtaýdyń tıimdi menedjeri» nomınatsııasy syılyǵyn Nur-Sultan qalasynyń Qoǵamdyq densaýlyq saqtaý basqarmasynyń basshysy Marat Shoranov Qalalyq jedel-járdem stantsııasynyń bas dárigeri Tımýr Muratovqa saltanatty túrde tapsyryp, quttyqtady.
«Biregeı operatsııa júrgizgeni úshin» nomınatsııasyn Qalalyq №2 balalar aýrýhanasynyń neırohırýrgııa bóliminiń meńgerýshisi Azamat Jaıylǵanov jeńip aldy.
Al «Dıagnostıka men emdeýdiń jańa ádisin engizgeni úshin» syılyǵymen Qalalyq №1 aýrýhanasynyń ortohırýrgııa jáne endoprotez bóliminiń meńgerýshisi Rýslan Botaev marapattaldy.
«Jedel járdemniń úzdik brıgadasy» atalymynda Qalalyq jedel-járdem stantsııasy «Saryarqa» podstantsııasynyń №1 brıgadasy jeńimpaz atandy.
Kezekti «Tsıfrlandyrý kóshbasshysy» syılyǵyn Qalalyq №7 emhana jeńip aldy.
«BAQ-taǵy úzdik jarııalanym» nomınatsııasynda «Astana aqshamy» gazetiniń tilshisi Aıgúl Ýaısova ozyp shyqty.
Komıssııa sheshimimen Qalalyq №2 balalar aýrýhanasy «Habar» agenttiginiń atynan «Telearnanyń arnaıy syılyǵy» nomınatsııasyna ıe boldy. Nomınatsııany belgili telejúrgizýshi, jýrnalıst Maıa Bekbaeva tabystady.
Taǵy bir bedeldi nomınatsııanyń biri - «Qamqor» dep atalady. Bul atalymda «Doktor rekomendýet» baǵdarlamasynyń avtory, telejúrgizýshisi Aınur Tajına BI Juldyzaı qoǵamdyq qoryn marapattady.
Aıta keteıik, jyl saıyn Qazaqstanda maýsym aıynyń úshinshi jeksenbisinde Medıtsına qyzmetkerleri kúni atalyp ótedi.
«Altyn shıpager» músinshesinde shynaıy lavr butaǵy 24 karat altynmen qaptalǵan. Lavr japyraǵy densaýlyq pen uzaq ǵumyrdy bildiredi.
