Elordanyń úsh turǵyny kólik urlap, onyń shanaǵyn ózgertken
KÓKShETAÝ. QazAqparat - Nur-Sultan qalasynyń úsh turǵyny Tselınograd aýdanynan kólik urlap, onyń shanaǵyn «tıýnıng» jasap ózgertip astanada júrgen. Tártip saqshylaryna qylmysty ashý úshin birneshe aı qajet bolǵan, dep habarlaıdy QazAqparat tilshisi.
Aqmola oblystyq polıtsııa departamenti baspasóz qyzmetiniń málimetinshe, 2021 jylǵy 21 shildede Sofıevka aýylynyń 27 jastaǵy turǵyny polıtsııaǵa úı aýlasynda turǵan «VAZ 2114» markaly avtokóligi urlanǵanyn aıtqan. Shyǵyn somasy 700 myń teńgeni qurady.
«Jedel-izdestirý sharalary barysynda polıtsııa qyzmetkerleri qylmys jasaǵan kúdiktilerdiń 19, 27 jáne 34 jastaǵy elordanyń úsh turǵyny ekenin anyqtady. Olar shildeniń 21-de túngi ýaqytta aýlada turǵan kólikti syrtqa shyǵarǵan. Keıin ashyq turǵan júksalǵysh arqyly kóliktiń ishine enip, astanaǵa aıdap áketken», - dedi vedomstvodan.
Osylaısha, olar bireýdiń kóligin jeke maqsatta paıdalanbaqshy bolǵan. Kúdiktiler urlanǵan kóliktiniń syrtqy shanaǵyna «ottıýnıng» jasap, «VAZ 2109» kóligine ózgertken.
«Polıtseıler Qylmystyq kodekstiń 188-shi babynyń 1-shi bóligi «urlyq» boıynsha sotqa deıingi tergeý amaldaryn júrgizýde», - dep tolyqtyrdy vedomstvodan.
