Elordanyń TJD qyzmetkerleri jer úılerge datchık ornatyp jatyr
NUR-SULTAN. QazAqparat – Elordanyń Tótenshe jaǵdaılar departamentiniń qyzmetkerleri jeke úılerdiń órtenýiniń aldyn alýǵa baǵyttalǵan aýqymdy deńgeıde reıd júrgizip jatyr, dep habarlaıdy QazAqparat tilshisi.
«Nur-Sultan qalasynyń Tótenshe jaǵdaılar departamenti órt qaýipsizdigi aılyǵyn ótkizý úshin aldyn ala bir aı buryn daıyndalady. Qazirgi tańda medıajospar ázirlenip, qala basshylyǵy ol jospardy tolyq bekitti. Medıajospar arqyly halyqqa órt qaýipsizdigi jóninde úgit-nasıhat jumystaryn júrgizemiz. Órt qaýipsizdigi taqyrybynda vıdeorolıkterdi ázirlep, qalanyń LED-ekrandarynda, adamdar kóp jınalatyn oryndar men oıyn-saýyq ortalyqtarynda jarııalaımyz. Sonymen birge, qalaishilik qoǵamdyq kólikterde de sol vıdeolardy kóberek kórsetýge tyrysyp jatyrmyz», - dedi qalalyq TJD aǵa ınjeneri, aǵa leıtenant Beksultan Rahymbaev reıd barysynda.
Departament ókiliniń aıtýyna qaraǵanda, jyl basynan beri jeke turǵyn úılerde ys pen órtten eskertetin 1164 dabyl sensory tegin ornatylǵan.
«Jyl basynan beri mundaı datchıkterdiń adam ómirin qutqaryp qalý jaǵdaılary kezdesti. Máselen, Aqmola kóshesindegi úılerdiń birinde tutas bir otbasyn datchıktiń dybysy eskertip, qıyn jaǵdaıdan qutqaryp qalǵan. Sonymen birge, eriktilermen birge úılerdi aralap, jergilikti polıtsııa qyzmetiniń qyzmetkerlerimen reıd júrgizip júrmiz. Odan bólek, qarasha aıynan beri úıdiń kommýnaldyq tólemi boıynsha keletin qaǵazdardyń ekinshi betine órt qaýipsizdigi boıynsha mańyzdy aqparattardy jarııalap, halyqty barynsha saq bolýǵa shaqyryp jatyrmyz. Kommýnaldyq tólem arqyly taralatyn qaǵazdar 300 myń danamen shyǵady», - dedi ol.
Departament ókili sondaı-aq, sensor qurylǵylardy elordadaǵy úsh aýdan ákimdigi kóptep satyp alyp, halyqqa tegin taratatynyn jetkizdi.
«Jýyq arada taǵy 110 datchık taratylady. Elordadaǵy jeke turǵyn úılerdiń halqyna naqty qansha datchıktiń kerektigi jóninde qolda naqty málimet joq. Sebebi, keıbir azamattar datchıkti ózi satyp alady. Keıbirine alyp berýimiz kerek», - dedi ol.
