Elordanyń turǵyn úı alaby turǵyndaryn ne mazalaıdy
NUR-SULTAN. QazAqparat – Elordanyń 16 turǵyn úı alabynda 300 myńǵa jýyq halyq turady. Bul týraly búgin qala turǵyndarymen esep berý kezdesýinde elorda ákimi Altaı Kólginov aıtty, dep habarlaıdy QazAqparat tilshisi.
«Qalada barlyǵy 16 turǵyn alaby bar, onda 300 myńǵa jýyq adam turady. Bul - búkil elorda halqynyń tórtten biri. Turǵyn alaptary turǵyndaryn ne mazalaıdy? Biz problemalardy saraptama, toptaǵan kezde mynadaı máselelerdi anyqtadyq. Birinshisi - káriz júıesi, sý qubyry, gazdandyrý syndy ınjenerlik ınfraqurylym. Kelesisi – kógaldandyrý, jol ınfraqurylymyn damytý, áleýmettik nysandar salý, emhana, mektep, sport nysandary. 2020 jyly aýqymdy jumys júrgizdik», - dedi qala basshysy.
Elorda ákimi jekemenshik uıymdardyń ókilderimen birneshe ret kezdesýdiń arqasynda, úıdiń ishine gaz tartý qunyn ortasha alǵanda 30 paıyzǵa tómendetý múmkin bolǵanyn aıtty.
«Gaz tartý boıynsha úlken jumys atqaryldy. Bıylǵy jylytý maýsymynda Temirjol, Kóktal-2 turǵyn alaptarynynyń turǵyndary, Agroqalashyqtyń bir bóligi gazǵa kóshý múmkindigine ıe boldy. Qazir Kóktal-1, Óndiris, Ońtústik-Shyǵys turǵyn alaptarynda qurylys-montaj jumystary júrip jatyr. 300 shaqyrym gaz taratý jelileri salyndy. Gazdandyrý – Elbasynyń tarıhı jobasy», - dedi Altaı Kólginov.
Onyń aıtýynsha, 2020 jyly elordanyń turǵyn alaptarynda 100 astam kóshege asfalt tóseldi, 40 astam qoǵamdyq keńistik, aýlalar abattandyryldy. Birqatar áleýmettik nysan salyndy, onyń ishinde mektepter de bar.
