Elordanyń «túngi sotyna» kimder júginedi
ASTANA. QazAqparat - Elordanyń «túngi soty» kómegimen júrgizýshiler saqtandyrý kómegin 15 kúnniń ishinde ala alady. Bul týraly búgin respýblıkalyq sýdıalardyń keńeıtilgen keńesinde Astananyń mamandandyrylǵan aýdanaralyq ákimshilik sotynyń sýdıasy Uldana Súleımenova aıtty, dep habarlaıdy QazAqparat tilshisi.
«Túngi sot» ne úshin qajet? Máselen polıtsııa qyzmetkeri jol-kólik oqıǵasy boıynsha hattama toltyrady. Júrgizýshiniń kináli ekendigi aıqyn jáne ol ony moıyndap otyr. Aldymen polıtsııanyń materıaldy sotqa jibergenin kútedi. Odan keıin sot qaraıdy. Buǵan qosa, sottyń sheshimi kúshine enýi tıis. Sodan keıin ǵan saqtandyrý tólemi jasalady. Munyń barlyǵyna úsh aı ýaqyt ketedi. Osy merzim ishinde kólik qańtarylyp turady. Al ol bireýlerdiń jalǵyz tabys kózi bolýy múmkin. Júrgizýshi quqyq buzǵanymen kelisetin aıqyn ister 70 paıyzdan asady. Al «túngi sot» bul problemany sheshedi», - dedi ol.
Onyń aıtýynsha, Astananyń mamandandyrylǵan aýdanaralyq ákimshilik soty keshki saǵat 18-30-dan 22-00-ge deıin kezekshilik engizgen. Ákimshilik polıtsııamen memorandýmǵa qol qoıylyp, ózara is-qımyldyń naqty algorıtmi ázirlengen. Hattama toltyrylǵannan keıin materıal bir táýliktiń ishinde sotqa túsedi.
Іs «túngi sotta» qaralýy úshin júrgizýshiniń kinásin moıyndaý jáne túngi ýaqytta qaraýǵa kelisimi qajet. Sol kúni istiń kelesi kúni qaralatyndyǵy týraly sheshim qabyldanady. Bul jaıynda taraptarǵa sms kómegimen habarlandyrý jiberiledi. Al úshinshi kúni taraptar sot qaýlysymen saqtandyrý kómegin alýǵa barady. Osylaısha, mundaı isterdi qaraý merzimi 100-den 15 táýlikke deıin qysqaryp otyr.
Jalpy, ilki joba qolǵa alynǵan 20 jumys kúnniń ishinde «túngi sotta» 300 is qaralyp, óz sheshimin tapqan.
