Elordanyń temir jol vokzalynda polıtseılerdi balaǵattaǵan qala turǵyny jaýapkershilikke tartyldy
ASTANA. QazAqparat - Polıtsııa qyzmetkerlerin balaǵattaý, qarsylyq bildirý jáne kúsh qoldanýǵa qatysty qylmystardy tergeý isi QR ІІM Kóliktegi ІІD basshylyǵynyń erekshe baqylaýynda.
Bılik ókiliniń óz mindetterin atqarýyna baılanysty oǵan qatysty kúsh qoldaný qoldanystaǵy qylmystyq zańda (QR QK 380 baby) eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady. Soǵan qaramastan ishki ister organdary qyzmetkerlerine qatysty olardyń qyzmetterin óteý kezinde kúsh qoldanyp, dene jaraqatyn salý oqıǵalary oryn alýda.
Máselen, Astana stansasy Jelilik polıtsııa bólimine temir jol vokzaly ǵımaratynda qoǵamdyq tártipti buzyp, janjal shyǵarǵan Astana qalasynyń 37 jastaǵy turǵyny jetkizilgen.
Oqıǵa elorda temir jol vokzaly ǵımaratynda ornalasqan dámhanalardyń birinde oryn alǵan.
Tártip buzýshyny polıtsııa bólmesine jetkizý kezinde ol polıtsııa qyzmetkerleriniń talaptaryna baǵynbaı, qarsylyq bildirgen, bılik ókiline dóreki sózder aıtyp, eskertýlerge qulaq aspaǵan.
Medıtsınalyq kýálandyrýdyń qorytyndysy quqyq buzýshynyń jeńil dárejede mas kúıde bolǵandyǵyn kórsetti.
Atalǵan fakt sotqa deıingi tergeýdiń biryńǵaı tizilimine QR QK-niń 379-baby 1-bólimi boıynsha tirkeldi (bılik ókiline baǵynbaý).
Jyl basynan beri óz qyzmettik mindetterin atqarý kezinde jelilik polıtsııa qyzmetkerlerine qatysty kúsh qoldanýǵa baılanysty 47 fakti tirkeldi. Júrgizilgen taldaý bılik ókiline qarsylyq kórsetý áreketteriniń basym kóbi patrýldik polıtsııa qyzmetkerlerine qatysty ekendigin kórsetti.
