Elordanyń tazartý qurylǵylary aldaǵy eki jylda salynyp bitedi
NUR-SULTAN. QazAqparat - Nur-Sultan ákimi Altaı Kólginov elordanyń tazartý qurylǵylarynyń obektilerin aralap, qala kóshelerin sý basý problemasyn sheshý barysymen tanysty, dep habarlaıdy QazAqparat elordanyń resmı saıtyna silteme jasap.
Ákim tazartý qurylysy men kollektor qurylǵylary jańartylatyn Uly Dala dańǵylynda Sh. Beısekova kóshesinen bastap Turan dańǵylyna deıingi bólikte salynyp jatqan jol qurylysymen tanysty. Salynyp jatqan ýchaskeniń uzyndyǵy - 3,191 shaqyrym, jol bóliginiń eni - 32,5 m. Aǵyn kóleminiń ulǵaıýyn qosa eseptegende dál qazirgi jaǵdaıda tazartý qurylǵylary men sorǵy stantsııasynyń jobalyq qýattylyǵy jetkiliksiz bolyp otyr. Tolassyz jaýǵan jaýyn-shashynnan keıin sý kósheniń kólik júretin bóligine jaıylyp ketetindikten «Astana Tazalyq» JShS Uly Dala kóshesi men Turan dańǵylynyń qıylysyna únemi qosymsha sorǵy qoıyp otyrady. Osyǵan baılanysty atalǵan máseleni sheshý úshin tazartý qurylǵylaryn jetildirý maqsatynda jobalyq-smetalyq qujattamaǵa túzetý engizý kerek.
Altaı Kólginov aralaý barysynda B. Momyshuly saıabaǵynda ornalasqan sý tartý júıesine qaıta jóndeý jumystary qajettiligi bar 1-4 aýdanynyń tazartý qurylǵysynyń jumysymen tanysty. Bul jerge jaýyn-shashyn aǵyny Abylaıhan kóshesi, Ońtústik-Shyǵys shaǵyn aýdany, Táýelsizdik, Toqpanov jáne ózge de kóshelerden jınalady. Dıametri 1000 mm bolatyn bul jetkizýshi kollektor da kelip túsetin sý kólemine tótep bere almaıdy. Bul ýchaskedegi jaýyn-shashyndyq káriz júıesi tipti qalypty jańbyrly kúnniń ózinde de B.Momyshuly kóshesiniń tómengi oryndary men jetkizýshi kollektordyń sýynsyz da aǵyndy qabyldaýdy qamtamasyz ete almaıdy. Bul máseleni sheshý úshin qosalqy kollektor salynatyn bolady. Sondaı-aq, qurylǵylardyń ónimdiligin ulǵaıtylyp, tundyrý qoımalarynyń sany qosymsha sý sorǵysymen birge 5-ten 8-danaǵa deıin arttyrylady.
Ákim sondaı-aq, Táshenev kóshesindegi №20 úıdiń janynda aldaǵy ýaqytta salynatyn jaýyn-shashyndyq káriz júıesiniń qurylysy men I-5 aýdanyndaǵy kollektorlardy jetkizýshi tazartý qurylǵylaryn qaıta qalpyna keltirý qurylysy jumystary júrgiziletin orynǵa bardy. Ázirge munda I-5 aýdanyndaǵy jaýyn-shashyn aǵynyn sýjınaqtaǵyshta tundyryp, ári qaraı Aqbulaq ózeniniń saǵasyna jiberý úshin aýdany 3 ga (tereńdigi 6-7 m) bolatyn jınaqtaǵysh toǵan jumys istep tur. Alaıda shybyn-shirkeıdiń taralý oshaǵyna aınalǵandyqtan jaýyn-shashyn aǵynyn tazartýdyń bul tásili zamanýı ekologııalyq talaptarǵa saı kelmeı otyr.
Mol nóser jańbyr kezinde sý aǵynyn jetkizýshi kollektorlar kelip túsetin kólemdi aǵynǵa tótep bere almaǵandyqtan, «Jastar» shaǵyn aýdany ýchaskesin sý basyp qalýy múmkin. Sondyqtan bul jerde de sý tartý júıesine qaıta jóndeý jumystaryn júrgizý qajet.
