Elordanyń tártip saqshylary 80 keli marıhýana satpaq bolǵan kúdiktini qolǵa túsirdi

NUR-SULTAN. QazAqparat - Nur-Sultan qalasy Polıtsııa departamenti esirtki qylmysyna qarsy is-qımyl basqarmasynyń qyzmetkerleri elorda aýmaǵyna esirtki ákelip, ótkizýmen aınalysatyn adamdardy ustaý boıynsha jedel-izdestirý is-sharalaryn ótkizdi, dep habarlaıdy QazAqparat atalǵan vedomstvoǵa silteme jasap.

«Jedel izdestirý is-sharalary barysynda Abylaı han dańǵylynyń boıyndaǵy turǵyn úı-jaıǵa tintý júrgizý kezinde buryn birneshe ret sottalǵan 49 jastaǵy Jambyl oblysynyń turǵyny ustaldy. Odan salmaǵy 80 keliden asatyn «Marıhýana» tabylyp, tárkilendi. Bul 40 000 retten astam qoldanýǵa bolatyn dozany quraıdy», - dep habarlaıdy qalalyq polıtsııa departamenti.

Habarlamada aıtylǵandaı, kúdikti atalǵan esirtkini satpaqshy bolǵan.

«Atalǵan fakti sotqa deıingi tergep-tekserýdiń biryńǵaı tizilimine tirkeldi. Qazirgi ýaqytta ustalǵan adam ýaqytsha ustaý ızolıatoryna qamaldy. Osy iske qatysy bar adamdardy anyqtaý jáne ustaý boıynsha is-sharalar júrgizilýde», - delingen habarlamada.

Jalpy jyl basynan beri elorda polıtseıleri 150 keliden astam túrli esirtki quraldaryn tárkilegen. «Esirtkini ótkizý» baby boıynsha 73 jáne sondaı-aq túrli esirtki quqyq buzýshylyqtary boıynsha 370 qylmystyq is qozǵaldy.