Elordanyń talantty stýdentteri marapattaldy
ASTANA. QazAqparat - «Jańa beles» festıvaline elorda kolledjderiniń myńǵa tarta stýdenti qatysty, dep habarlaıdy Astana ákimdiginiń resmı saıty.
Festıval-baıqaýdyń jeńimpazdary «Vokal», «Horeografııalyq óner», «Shyǵarmashylyq» (kórkemsóz oqý), «Fotobaıqaý» jáne «Zııatkerlik oıyndar» sııaqty bes atalym boıynsha anyqtaldy.
Shyǵarmashylyq konkýrstyń fınalısterin, jeńimpazdary men júldegerlerin «Astana jastary» ortalyǵynyń jetekshisi Úkibaı Nurpeıisov marapattady. «Eń aqyldy» atalymynda Joǵary medıtsınalyq kolledjiniń stýdentteri Álisher Zakırov pen Elaman Saǵatov birinshi jáne ekinshi orynǵa ıe boldy. Menedjment jáne bıznes kolledjeniń stýdenti - Zınaıda Knaıp úshinshi orynda.
«Fokýsta» atalymynda Gýmanıtarly kolledj stýdentteri - Arýjan Ábiltaeva men Nurlat Іzmahanovtyń jumystary úzdik dep tanyldy. Úshinshi júldeni Polıtehnıkalyq kolledjdiń stýdenti Ádilbı Kapparov utyp aldy. «Mundaı baıqaýǵa men buryn-sońdy qatysyp kórmeppin.
Sýretke túsirýmen kásibı deńgeıde aınalyspaıtyndyqtan, konkýrsta jeńiske jetemin dep oılaǵan joqpyn. Bizge shyǵarmashylyq qabiletterimizdi kórsetýimizge múmkindik berilgenine óte qýanyshtymyn. Bul qatysýshylardyń boıynda ózine degen senim qasıetin ushtaı túsedi. Bul óte mańyzdy», - dedi «Fotokonkýrs» nomınatsııasynyń jeńimpazy Arýjan Abıltaeva.
«Avtorlyq oqý» atalymynda birinshi oryn Gýmanıtarly kolledjdiń stýdenti Elemes Ersinge, ekinshi oryn Menedjment jáne bıznes kolledjiniń stýdenti Ábil Symbatqa jáne úshinshi oryn Jańyljan Joldamuratqa buıyrdy.
Al EAGI kolledjiniń stýdenti Naǵashybekov Bekzat kórermender kóz aıymyna aınaldy.
