Elordanyń stýdent jáne oqýshy jastary jazda eńbekke ornalastyrylyp jatyr
NUR-SULTAN. QazAqparat - «Stýdenttik qurylys jáne «Jasyl el» jastar eńbek jasaqtary» jobasynyń aıasynda osy jazda elordada jumyssyz júrgen jastar, stýdentter jáne mektep oqýshylary arasynan 975 jas jumysqa ornalastyrylady, dep habarlaıdy QazAqparat.
Elbasynyń tapsyrmasymen 2005 jyldan beri elordada jáne elimizdiń barlyq óńirinde «Jasyl el» baǵdarlamasy júzege asyrylyp jatyr. On tórt jyl boıy elordalyq «Jasyl el» shtaby qalany kógaldandyrý men jastardy áleýmettendirýge, jazǵy maýsymda 14-29 jas aralyǵyndaǵy stýdentter men jastardy jumyspen qamtamasyz etýge eleýli úles qosýda. Búginde jazǵy maýsymda jastardy jumyspen qamtamasyz etý boıynsha kelisimge 50-den asa mekeme qol qoıdy. Olardyń arasynda «Astana ormany» JShS, «Astana zelenstroı» AQ, «Astana tazalyq» AQ, «Bazıs A» qurylys kompanııasy, «Stroı Grýpp Injınırıng», «Kapstro 2017» jáne qalanyń birqatar bilim mekemesi bar», - delingen Nur-Sultan qalasy ákimdiginiń málimetinde.
Málim bolǵandaı, mamyr aıynda «Jasyl el» jasaqtarynyń qatarynda 100 adam eńbek etti. Maýsym aıynda olardyń sany 500 adamdy qurady, onyń 200-i kópbalaly jáne áleýmettik az qamtylǵan otbasynan shyqqan. 18 jastan asqan jasyleldikterdiń ortasha jalaqysy 80 myń teńgeni quraıdy. 
Erasyl Musataev «Jasyl el» qataryna bıyl jazda kirdi. Onyń otbasynda 7 bala bar. Mamyr aıynda №63 mekteptiń 10-synybyn bitirgen ol, jazda otbasyna kómektesý úshin jumys isteýdi sheshken.
«Mektep oqýshylary men stýdentterge sabaǵynan qalmaı, oqýynan tys ýaqytta óz eńbegimen, adal terimen qosymsha jumys istep, tabys tabýǵa múmkindik berip otyrǵan ıgiligi mol baǵdarlamaǵa alǵys aıtqym keledi. Bul baǵdarlamanyń arqasynda otbasyma kómektesip qana qoımaı, ózimmen qatar jastarmen tanysyp, jańa dostar taptym. Al tabysyma ózime jáne ini-qaryndastaryma aldaǵy oqý jylynda mektepke qajet zattar alǵym keledi», - dedi Erasyl Musataev.
Budan basqa, jumys nátıjeleri boıynsha baǵdarlamanyń barlyq qatysýshysyna 35 394 teńgeni quraıtyn 2 bazalyq laýazymdyq jalaqy mólsherinde aqshalaı syıaqy (jumys berýshiniń qyzmetkerlerine eńbekaqyǵa qosymsha aqy) tólenedi.
