Elordanyń sport nysandary kópshilikke qanshalyqty qoljetimdi
NUR-SULTAN. QazAqparat - Nur-Sultan qalasynda 11 balalar men jasóspirimderine arnalǵan sport mektebinde 49 sport túrinen sektsııa bar, onyń qyzmetin 9 300 adam tegin paıdalanady, dep habarlaıdy QazAqparat ákimdiktiń saıtyna silteme jasap.
Elordanyń birqatar sport nysanynda halyqtyń sportpen kedergisiz jattyǵýy úshin jaǵdaı jasalǵan. Máselen, «Alaý» muz aıdynynda jattyǵý zaly pen muz arenasynda jappaı syrǵanaý qyzmeti usynylady. Onda stýdentter, oqýshylar, zeınetkerler, birinshi sanattaǵy múgedekter úshin 50% jeńildik bar. 7 jasqa deıingi balalarǵa jáne kópbalaly otbasylardyń balalary, balalar úıiniń tárbıelenýshileri, ІІ, ІІІ sanattaǵy múgedekter tegin qatysa alady.
«Dáýlet» sport kesheninde 5-14 jasqa deıingi 620 bala aınalysady, onyń 255-i tegin, al 365-i aqyly túrde qatysady. 12 jattyǵýdyń aqysy 13 500 teńge. Buǵan qosa, kópbalaly jáne az qamtamasyz etilgen otbasylardyń balalaryna 50 paıyz jeńildik bar.
Memlekettik-jekeshelik seriktestik boıynsha Paralımpıadalyq jattyǵý ortalyǵynda múmkindigi shekteýli azamattarǵa barlyq qyzmetter tegin kórsetiledi. Jattyǵý para ıoga, ústel tennısi, para karate, para taekvando, arbamen bıleý, para badmınton, para paýerlıftıng, para aerobıka, otyryp voleıbol oınaýdan ótedi.
Sondaı-aq «Tarlan» sport kesheninde jumys kúnderi saǵat 13.00 men 15.00 aralyǵynda múmkindigi shekteýli azamattarǵa tegin syrǵanaý uıymdastyrylady, konkı tegin beriledi. Qaıtarymsyz negizde slesh-hokkeı men sýrdo-hokkeıden jattyǵý júrgiziledi. Keshkisin jattyqqysy kelgen azamattar Q.Muńaıtpasov atyndaǵy stadıonnyń júgirýge arnalǵan jolyn tegin paıdalana alady. https://astana.gov.kz/kz/news/news/20834
