Elordanyń shetkeri aımaqtary qalaı damyp jatyr
NUR-SULTAN. QazAqparat - Nur-Sultan qalasynyń ákimi Altaı Kólginov elordanyń shetki aımaqtarynyń abattandyrylýy jaıly málim etti, dep habarlaıdy QazAqparat qala ákimdigine silteme jasap.
«Búgin qalanyń shetkeri aımaqtaryna bardym. Qalada barlyǵy 280 myń adam turatyn 16 eldi meken bar. Bul - elorda halqynyń tórtten biri. Árbir eldi meken boıynsha qadamdyq is-sharalar jospary ázirlendi. Mysaly, byltyr eldi mekenderde 100-den astam kóshe asfalttaldy, 40-tan astam qoǵamdyq keńistik (saıabaqtar, skverler, býlvarlar) jáne aýlalar abattandyryldy. Birqatar áleýmettik nysan, sonyń ishinde mektep pen «úı mańyndaǵy dáriger« nysandary jáne t. b. salyndy», - dedi Altaı Kólginov.
Ákimniń 13,5 shaqyrym ınjenerlik jeli, 5 shaqyrymnan astam káriz jáne sý qubyry, 3 shaqyrymnan astam nóser kárizi salynǵan.
«Bul jumystyń barlyǵyn júıeli túrde júrgizemiz. Eldi mekenderdi aralaý barysynda turǵyndarmen osy jylǵa arnalǵan josparlar talqylandy. Árbir eldi mekenge baryp, is-sharalar josparyna turǵyndardyń qajettiligin engizemiz.
Búgin sondaı-aq dene shynyqtyrý-saýyqtyrý keshenderi qurylysynyń barysymen tanystym. Egde jastaǵy adamdarǵa arnalǵan klýbtar, HQKO, polıtsııa pýnktteri, poshta bólimsheleri ornalasatyn sport mekemeleri tórt eldi mekende paıda bolady. Turǵyndar sport keshenderine tegin bara alady», - dedi ákim.
Sonymen qatar, elordada Memleket basshysynyń tapsyrmasyna sáıkes bıylǵy jylytý maýsymynda birqatar eldi meken gazǵa qosyldy.
Kóktal-1 eldi mekeninde júrgizilip jatqan gaz taratý jelileriniń qurylysy júrgizilip jatyr. Ákimniń aıtýynsha jumystardyń 90%-dan astamy oryndalǵan.
«Buǵan deıin Jeleznodorojnyı, Kóktal-2, Agroqalashyqtyń (bir bóligi) eldi mekenderiniń turǵyndary gazǵa qosyldy. Sondaı-aq, 1-JEO jáne 2-JEO birqatar sý jylytý qazandyqtary gazǵa aýystyryldy. 2021 jyldyń sońyna deıin Ońtústik-Shyǵys (oń jáne sol jaǵy), Óndiris, Kóktal-1, Agroqalashyq eldi mekenderi gazben qamtamasyz etiledi. Sondaı-aq, « QazTransGaz Aımaq « AQ Kúıgenjar, Internatsıonalnyı, Mıchýrıno eldi mekenderinde osy jyldyń sońyna deıin gaz ótkizýdi josparlap otyr.
Gazdandyrý protsesi úsh kezeńnen turady. Gazdandyrý qalanyń ekologııasyn jaqsartyp qana qoımaı, jeke sektor turǵyndarynyń ómir súrý jaǵdaıyn jeńildetýge múmkindik beredi», - dedi elorda ákimi.
