Elordanyń saýda oryndaryndaǵy satýshylardan veterınarlyq-sanıtarlyq qadaǵalaý qyzmetkerleri zańsyz aqsha jınap otyrǵan
ASTANA. Aqpannyń 20-sy. QazAqparat /Jasulan Amanbaıuly/ - Veterınarlyq-sanıtarlyq qadaǵalaý qyzmetkerleri satýshylardan zańsyz aqsha men azyq-túlik jınap otyrǵan. Aýyl sharýashylyǵy mınıstriniń ınternet blogyna jáne anonımdi senim telefondaryna osyndaı shaǵymdardyń túsýine baılanysty vıtse-mınıstr Arman Evnıev «Álem» saýda ortalyǵynda satýshylarmen kezdesý uıymdastyrdy,
dep habarlaıdy QazAqparat.
Mınıstrdiń blogyna, hat túrinde, telefon arqyly veterınarlyq ınspektorlardan ruqsatnamalardy jáne basqa da qujattardy erkin satyp alýǵa bolatyndyǵy jóninde shaǵymdar kelip túsip jatyr. Sonymen qatar basshylyq úshin azyq-túlik qorjyndary men aqshalar jınalyp otyratyndyǵy aıtylady.
Aýyl sharýashylyǵy vıtse-mınıstri A. Evnıevtiń aıtýynsha, «Álem» saýda ortalyǵynyń satýshylarynan túsken aryzdardan keıin arnaıy qurylǵan tergeý komıssııasy tekseris jasap, atalmysh faktilerdi rastady.
Onyń aıtýynsha, veterınarlyq-sanıtarlyq qadaǵalaý qyzmetkerleri satýshylardan zańsyz aqshany «basshylyqqa» degen jeleýmen jınap otyrǵan. «Men - Aýyl sharýashylyǵy vıtse-mınıstri Arman Evnıev myna hattardy oqı otyryp, zańsyz jınaýlar maǵan jóneltiletin bolǵany ǵoı dep túsindim. Naqaqtan naqaq meniń ar-namysyma kir kelgendeı sezimde boldym», dedi vıtse-mınıstr A. Evnıev.
Vedomstvo ishindegi tártiptik keńestiń elordadaǵy saýda oryndarynda oryn alyp jatqan faktilerge arnalǵan shuǵyl otyrysy barysynda Astana qalasynyń aýmaqtyq ınspektsııasynyń bastyǵyn qyzmetinen alyp tastaý týraly sheshim shyǵarylǵan.
Satýshylarmen bolǵan kezdesýde A.Evnıev qadaǵalaýshy organdar tarapynan bolatyn barlyq jemqorlyq kórinister jóninde habarlasýdy surady.
