Elordanyń Saryarqa aýdanynda 12,5 myń turǵyn senbilikke shyqty

ASTANA. QazAqparat – Búgin Astanada jalpyqalalyq senbilik ótip jatyr. Saryarqa aýdanyndaǵy saıabaqtar men skverlerdi jınaýǵa 12,5 myńǵa jýyq turǵyn shyǵyp, 600 aǵash otyrǵyzyldy, dep habarlaıdy QazAqparat tilshisi.

Qatysýshylar arasynda shaǵyn jáne orta bıznes, mádenıet, sport, ardagerler keńesiniń, sondaı-aq úkimettik emes uıymdardyń ókilderi, eriktiler men elorda turǵyndary bar.

«Qaraǵaı, shyrsha, qaıyń sııaqty aǵashtar otyrǵyzyldy. Saıabaq aýmaǵynda sýarý júıesi bar. ıAǵnı, 15-20 mınýt saıyn ár ýchaskede avtomatty sýarý júrgiziledi. Oǵan merdiger uıym men sýarý qyzmeti, sondaı-aq ákimdik tarapynan tehnıkalyq qadaǵalaý jasalady», - deıdi Astana qalasy Saryarqa aýdany ákimi apparaty kommýnaldyq sharýashylyq bóliminiń bas mamany Janseıit Tynbaev.

Onyń aıtýynsha, aǵashtardyń 90-95% aýmaqqa beıimdelip, tez ósip ketedi.

Kóktal parkiniń jalpy aýdany - 15,7 gektar. Ashylǵan kúnnen bastap munda 8 myńnan astam tal egilgen.

«Ótken jazda, ásirese keshki ýaqytta, demalys, mereke kúnderi jergilikti turǵyndar munda jıi keletin boldy. Kópshilikke saıabaq unaıdy. Óıtkeni, parkke barý úshin sol jaǵalaýǵa bet alýdyń qajeti joq. Munda basketbol, tennıs, voleıbol alańdary, shaǵyn sáýlet nysandary, sportshylarǵa, jastarǵa arnalǵan alańdar, modýldik dárethanalar bar. Sondaı-aq, shaǵyn jáne orta bıznesti damytý josparlanǵan. ıAǵnı, barlyq nıet bildirýshiler áleýmettik-kásipkerlik korporatsııa arqyly ashyq túrde jumys isteı alady», - dep toqtaldy Janseıit Tynbaev.

Ol jaqyn arada turǵyndardyń jaılylyǵy úshin masa óltirý jumysy júrgiziletinin málim etti.

Eske salsaq, elordada 8 sáýirden 6 mamyrǵa deıin «Jasyl Astana» dástúrli ekologııalyq aılyǵy ótip jatyr.

Onyń aıasynda kommýnaldyq jáne jalpyqalalyq birneshe senbilik uıymdastyrylady.