Elordanyń Respýblıka dańǵyly saýda núkteleri shoǵyrlanǵan serýen kóshesi bolady
NUR-SULTAN. QazAqparat - «Nur-Sultan – jaıly qala» bas jospary aıasynda Respýblıka dańǵylyn ekonomıkanyń shoǵyrlanǵan orny retinde abattandyrý josparlanyp otyr, habarlaıdy QazAqparat.
Bul jospar ózgerister men jyldam nátıjelerge baǵyttalǵan.
«Búgingi kúni barlyq kontınentte naryqtyq saýda jáne jeńil ónerkásip kóshelerde damyp keledi. Nıý-Iorktegi Brodveı kóshesi, Londondaǵy Oksford jáne kóptegen basqa álemdik qalalar sııaqty kóshedegi ekonomıkany qoldaıtyn keremet mysaldar bar. 2006 jyldan bastap AQSh-ta bir de bir jańa saýda ortalyǵy tirkelgen joq. Olar saýda men kásipkerliktiń kóshede damýy kerek ekenine senimdi» dep málim etti qalalyq ýrbanıstıka ortalyǵy.
Vedomstvonyń aqparatyna sensek, bul tásil halyqty jaıaý júrýge, sol arqyly belsendi jáne saý bolýǵa ıtermeleıdi.
«Bul - búgingi tańda búkil álemdegi ońaltý sharasy. Biz óz kezegimizde sapaly qyzmetter men taýarlar usynylatyn qaladaǵy kásipkerlik kóshelerdi damytýymyz kerek. Kóshede serýendeý úshin jaǵdaı jasaýymyz qajet. Kóshelerdi jańa zaman talaptaryna beıimdep, belsendilikti qalyptastyrý mańyzdy» delingen habarlamada.
Bul nátıjeler ekonomıkanyń ósýine túrtki bolady jáne jaıaý júrginshilerdiń qozǵalysy úshin jaǵdaı jasaıdy, halyqtyń kirisin arttyrýǵa, jańa jumys oryndarynyń paıda bolýyna, ekonomıkanyń ósýine jáne áleýmettik áser etýge qyzmet etedi.
