Elordanyń orys drama teatry nemis dramatýrgy Bertold Brehtyń «Úshinshi Imperııadaǵy qorqynysh pen qaıyrshylyq» atty týyndysyn kórermen nazaryna usynbaq
STANA. Sáýirdiń 20-sy. QazAqparat /Zarına Rysbaeva/ - Jeńistiń 65 jyldyq mereıtoıyna oraı elordanyń M.Gorkıı atyndaǵy orys drama teatry alǵash ret belgili nemis dramatýrgy Bertold Brehtyń «Úshinshi Imperııadaǵy qorqynysh pen qaıyrshylyq» atty týyndysyn kórermen nazaryna usynbaq. Bul týraly búgin atalǵan teatrdyń dırektory Erkin Qasenov jýrnalıstermen bolǵan baspasóz máslıhaty barysynda málim etti.
«Bul óte úlken ári mańyzdy taqyryp. Biz árdaıym Jeńiske qalaı kelgenimizdi jáne osy soǵystaǵy erlikterimizdi 65 jyl boıy aıtýdamyz. Búgingi tańda da onyń jańa qyrlary ashylyp jatyr. Tek Jeńis jaıly emes, fashızmnyń qaıdan shyqqanyn, onyń negizgi túp tamyry qaıda jatqandyǵyn aıtqymyz keledi. Bul álemniń birqatar elderinde, Eýropa memleketterinde úlken dárejede qoıylǵan qoıylym, sondyqtan biz ony Qazaqstannyń astanasynda qoıýǵa sheshim qabyldadyq. Qoıylym búgingi egemen memleketimizdiń jas azamattaryna jańa baǵyt, jańa kózqaras beretinine senimdimiz» - dedi teatr dırektory, mádenıet qaıratkeri Erkin Qasenov.
Nemis dramatýrgi Bertold Brehtyń «Úshinshi Imperııadaǵy qorqynysh pen qaıyrshylyq» atty pesasy 24 novelladan turady. Biraq osy týyndylardyń arasynan ekshep alynǵan 12 novella ǵana elordalyq kórermender nazaryna usynylmaq. Qoıylymnyń bas rejısserlyǵyna shaqyrylǵan Avstrııa azamaty Egıshe Gevorkıannyń atap ótýinshe, álem teatrlarynyń barlyǵy da osy qoıylymdy tolyq sahnalaýǵa úmtylmaǵan. Tek ótken ǵasyrda ǵana ol Nıý-Iorkte tolyq sahnalanypty.
«Bul fashızmniń qalaı paıda bolǵandyǵy týraly novella. Ondaǵy oqıǵalar Ekinshi dúnıejúzilik soǵys bastalǵanǵa deıingi 1933-1938 jyldar aralyǵynda ótedi. Kórkemdik turǵydan alyp qaraǵanda, biz janrdyń barlyq kanondaryn saqtaýǵa tyrystyq. Alaıda taqyryp óte aýyr, sondyqtan keıbir sátterge basa nazar aýdarmaýǵa tyrystyq», deıdi ol.
Avstrııalyq rejısser men qazaqstandyq sýretshi-sahnashy Qanat Maqsutov bul pesanyń tek jańa qyrynan sahnalanýyn ǵana emes, sonymen birge fashızm, onyń shyǵý tegi, keńes adamdarynyń Uly Otan soǵysyndaǵy Jeńisi sııaqty mańyzdy sátterin de nazardan tys qaldyrmaı kórsetpek.
Qoıylymnyń naqty qaı kúni sahnalanatyny belgisiz ekendigin atap ótken teatr dırektorynyń sózine qaraǵanda, elordalyq kórermender ony mamyrdyń 9-ynan keıin tamashalamaq.
Sondaı-aq E.Qasenov bul pesanyń mamyr aıynyń 26-30-ynda Almatyda ótetin Orta Azııa elderiniń halyqaralyq teatr festıvaline usynylatyndyǵyn atap ótti.
