Elordanyń ortalyq alańynda oqýshylarǵa qajetti qural-jabdyqtar tómen baǵalarmen satylýda
ASTANA. QazAqparat - Elorda ákimdiginiń aldyndaǵy alańda qazaqstandyq óndirýshilerdiń mektep jármeńkesi ótip jatyr.
Astana qalasynyń bilim basqarmasy kámelet jasqa tolmaǵandardyń quqyqtaryn qorǵaý bóliminiń basshysy Lázzat Orynbasarovanyń aıtýynsha, birinshi kezekte jármeńke turmysy tómen jáne kóp balaly otbasylarǵa kómektesýge baǵyttalǵan. Onyń basty maqsaty - elordalyq balalardy mektepke qajetti zattarmen qamtamasyz etý.
Eki kúnge sozylatyn jármeńke barysynda astanalyqtar balalaryna mektep formasyn, sporttyq kostıýmder men aıaq kıimder tańdap, keńse taýarlary men kitaptardy 10-¬50 paıyz jeńildikpen satyp alýda.
«Biz «Klerk» keńse buıymdary dúkeninen kelip otyrmyz. Astana naryǵynda jumys istegenimizge 11 jyl boldy. Búgingi jármeńkede elordalyqtar barlyq mektepke qajetti qural-jabdyqtardy 10 paıyz jeńildikpen satyp ala alady. Máselen, dápter 12-15 teńgeden, qalamsaptar 30 teńgeden, flomasterler 200 teńgeden, sómkeler 3600 teńgeden saýdalanýda», - dedi atalǵan kompanııanyń menedjeri Talǵat Syzdyqov.
Sonymen qatar, shara barysynda halyqqa keńes beretin qoǵamdyq qabyldaý bólimi jumys isteıdi. Kópshilik nazaryna Oqýshylar saraılarynyń, mýzyka jáne óner mektepteri ujymdarynyń qatysýymen kontserttik baǵdarlama usynylady.
