Elordanyń ortalyq alańy qalaı túrlenedi: Ýrbanıstıka ortalyǵynyń nobaıy
NUR-SULTAN. QazAqparat – Nur-Sultan qalasynyń Ýrbanıstıka ortalyǵy elordanyń ortalyq alańyn jańǵyrtý nobaıyn jarııalady, dep habarlaıdy QazAqparat tilshisi.
«Ortalyq alańdy qaıta qurý qalanyń tarıhı ortalyǵyndaǵy abattandyrylǵan kósheler men jaǵalaýdaǵy tanymal qoǵamdyq oryndardy týra serýendeý joldarymen baılanystyrady. Qalanyń tarıhı alańy oń jaǵalaýdyń mańyzdy orny sanalady jáne búginde adamdardy tartýdyń tanymal núktesine aınalýǵa úlken múmkindigi bar. Qalalyq alańdy abattandyrý turǵysynan biz ádemi jáne qyzyqty sýburqaqtar keshenin qurýdy josparlap otyrmyz. Negizgi elementi týnneldi Arka fontany bolady, onda adamdar aǵyndar arqyly óte alady. Bul dızaında sýdan ottegin alyp tastaıtyn ortasha dıspersti forsýnkalar qoldanylady, nátıjesinde sý shyny tárizdi móldir bolady. Túngi ýaqyttaǵy jaryqtandyrý qosymsha áser beredi. Taǵy bir ereksheligi - shar tárizdi art nysan ishinde sýdan paıda bolǵan tuman bultynyń áserin týdyratyn forsýnkalar ornalasady. Shardyń aınalasynda qurǵaq sýburqaqtar qarastyrylady. Sýburqaqtar kesheni qala turǵyndary men týrısteriniń súıikti ornyna aınalady», - delingen Ýrbanıstıka ortalyǵynyń Instagram paraqshasynda jarııalanǵan aqparatta.
Joba boıynsha ortalyq bóliginde is-sharalar, kontsertter ótkizýge arnalǵan amfıteatr ornalastyrý qarastyrylǵan. Sondaı-aq, qala ormanyn qurý maqsatynda aýmaqty kógaldandyrý josparlanýda.
