Elordanyń óner qaıratkerleri túrkistandyq talantty balalarǵa syılyq jasady
Tórt qaqpaly Túrkistannyń tórinde boı kótergen «Aqjaıyq» mýzyka mektebi jańa aspaptarmen tolyqty. Tartý etken Elordalyq óner súıer azamattardyń bul syılyǵy Túrkistandyqtarǵa aspannan aspaptar jaýǵan kúnge teńegen qýanysh syılaǵan kún boldy.
«Túrkistan - tek oblys ortalyǵy ǵana emes, búkil túrki áleminiń astanasyna aınalyp otyr. Osyndaı bir keremet zamanaýı úlgide salynǵan mádenıet oshaqtarynyń ishinen talaı elimizdiń óner salasynyń maıtalmandary tárbıelenip shyǵady dep oılaımyn. Mine, búgin óner kórsetken 138 balanyń árqaısysy ár baǵytta tańdaǵan ónerleri bar ekenine kózimizdi jetkizdik. Sol balalarǵa tolyq bilim alýlary úshin, ózderiniń mádenı jáne rýhanı talpynystaryn arttyrý úshin osy mýzykalyq aspaptardy syılap otyrmyz!», - dedi Nur-Sultan qalasy máslıhatynyń hatshysy Erlan Qanalımov.
Zamanaýı úlgide salynǵan mektepte 138 oqýshy bala ónerdiń onnan asa túrinen dáris alady. Atap aıtqanda; dombyra, qobyz, jetigen, fortepıano, skrıpka, vokal, urmaly aspaptar, án-terme, baıan jáne soksofon. Úıirmelerge konservatorııa túlekteri ustazdyq etip, oqýshylar respýblıkalyq baıqaýlarda júldeli oryndarǵa ıe bolýda.
«Kez-kelgen memlekettiń erteńi – ol óskeleń urpaq ekeni zańdylyq. Ásirese, eldiń, ulttyń bolashaǵy árıne eń birinshi daryndy, ónerli, bilimdi, ıntelektýaldy jáne zerdeli urpaqtyń qolynda! Sondyqtan, búgin biz Elordadan Túrkistan qalasyna arnaıy at basyn buryp, búkil túrki dúnıesiniń altyn besigi ispettes Túrkistandaǵy «Aqjaıyq» mýzyka mektebine Elordalyq ákimdik pen máslıhattyń, Nur-Sultan qalasyndaǵy óner qaıratkerleriniń atynan arnaıy tapsyrys berip jasalǵan, sapasy óte myqty dombyra, qylqobyz, jetigen, baıan, skrıpka, prıma-qobyz sekildi aspaptardy alyp keldik. Bul aspaptar arqyly bolashaqta Túrkistandaǵy «Aqjaıyq» mýzyka mektebinde bilim alyp jatqan jas daryndar ózderiniń talanttaryn, shyǵarmashylyq áleýetin kórsetip, respýblıkalyq, halyqaralyq óner saıystarynda top jaryp shyǵatynyna senemin!», -dedi Nur-Sultan qalasy ákimdiginiń «Mýzykalyq jas kórermen» teatrynyń dırektory Ashat Maemırov.
