Elordanyń «Óndiris» turǵyn alabynda jańa sport kesheni salyndy
NUR-SULTAN. QazAqparat – Nur-Sultan qalasyndaǵy «Óndiris» eldi mekeninde jaqynda jańadan dene shynyqtyrý jáne saýyqtyrý kesheni ashylady, dep habarlaıdy QazAqparat qala ákimdigine silteme jasap.
Jańa keshen qurylysy «Elordanyń turǵyn alaptaryn damytý týraly» tujyrymdamasy aıasynda salyndy.
Jańa sport nysany Óndiris jáne S 638 kósheleriniń qıylysynda boı kóterdi. Ol jergilikti turǵyndardyń buqaralyq sportpen shuǵyldanýyna yńǵaıly bolmaq. Tolyqtaı jabdyqtalǵan nysanda fýtzal, voleıbol jáne basketbol alańy bar. Sol sııaqty dene shynyqtyrý jáne saýyqtyrý kesheninde arnaıy balalar men jasóspirimder úshin karate, sambo, kıkboksıng, mýaı-taı, kıokýshınkaı, grepplıng, paýerlıftıng, qol kúresi, taekvondo, pankratıon, qazaq kúresi, djıý-djıtsý syndy sporttyń 12 túrinen úıirme uıymdastyrylady. Oǵan 350 bala tartylmaq.
Jańa sport nysanynda jattyǵatyn balalar bolashaqta respýblıkalyq jáne halyqaralyq jarystarǵa qatysa alady. Al úzdik jas sportshylar Nur-Sultan qalasynyń quramasyna, sol sııaqty ulttyq quramalarǵa irikteledi.
Aıta keteıik, jańa keshenniń ishinde kúreske arnalǵan 215 sharshy metr zal, 93,2 sharshy metr aýmaqta jattyǵý zaly, 595 sharshy metr aýmaqta ámbebap zal jasaqtalǵan. Budan bólek, ǵımarat ishinde qarttarǵa arnalǵan klýb pen oqyrman zaly bar kitaphana bolady.
Aıta keteıik, Baıqońyr aýdanynyń ákimdigi atalmysh eldi meken turǵyndaryna jaıly jaǵdaı jasap, áleýmettik-mádenı ınfraqurylymnyń damýyna basa mán beredi.
