Elordanyń oń jaǵalaýynda qaı jerler abattandyrylady
ASTANA. QazAqparat – Elordanyń oń jaǵalaýynda 130-ǵa jýyq aýla men qoǵamdyq keńistik abattandyrylady. Bul týraly Astana qalasynyń ákimi Jeńis Qasymbek áleýmettik jelidegi paraqshasy arqyly málim etti, dep habarlaıdy QazAqparat.
«Elordanyń oń jaǵalaýyn kórkeıtý boıynsha aýqymdy jumys júrgizip jatyrmyz. Bıyl qalanyń oń jaǵalaýynyń ózinde 130-ǵa jýyq aýla men qoǵamdyq keńistikti abattandyramyz. Olar: Saryarqa, Baıqońyr jáne Almaty aýdandary. Al, 50-ge jýyq orynda jumys aıaqtaldy.
Máselen, Aqbulaq ózeniniń jaǵalaýy (Amman kóshesinen Táýelsizdik dańǵylyna deıin) abattandyryldy. Al kópirlerdiń astynda Aqbulaq ózeniniń boıyndaǵy saıabaq klasterin jalǵaıtyn jaıaý júrginshiler ótkelderi ashyldy. Sátbaev kóshesindegi jaıaý júrginshiler jolynyń (Muńaıtpasov kóshesinen Petrov kóshesine deıin) birinshi bóligin ashtyq.
Esil ózeniniń jaǵasynda Beısekov kóshesinen Kóktal eldi mekenine qaraı qoǵamdyq keńistikti abattandyrý jumysy júrip jatyr. Joba eki kezekke bólingen. Birinshi kezekti shilde aıynda aıaqtaýdy josparlap otyrmyz. Amfıteatr, sport alańdary, serýendeý oryndary, oıyn alańqaılary jáne t.b. jabdyqtalady.
Sonymen qatar, ortalyq jaǵalaýdyń tarıhı kóshelerin kórkeıtemiz. Olar: Jeltoqsan, Beıbitshilik, Buqarbaı batyr, Á. Mámbetov kósheleri. Bul jumys jańa qoǵamdyq keńistikterdi osyǵan deıin qurylǵan keńistiktermen jalǵaýǵa múmkindik beredi: demalys kúnderi «Demalys Promenade» jaıaý júrginshiler kóshesi, «Teatralnyı» býlvary, qalalyq alań jáne t.b. Osylaısha, qoǵamdyq keńistikterdiń tutas klasteri qurylady.
Sol sııaqty Aqan seri – Fahd ben Abdýl Azız (Agroqalashyq eldi mekeni), Kenesary – Beısekbaev, Kenesary – Egemen Qazaqstan, Qordaı – N. Ahmetbekov kósheleriniń qıylysynda, Abylaı han dańǵylynan Qudaıberdiuly dańǵylyna deıingi jaǵalaýda, K. Ázirbaev kóshesi, 10, Hrapatyı kóshesi jáne t.b. oryndardaǵy qoǵamdyq keńistikter abattandyryldy.
Budan bólek Bógenbaı batyr dańǵylynda Sh. Aımanov kóshesinen Sh. Ýálıhanovqa deıingi 10 aýlany qamtıtyn sharshy alańdy abattandyrý belsendi júrip jatyr. Sondaı-aq, Qudaıberdiuly dańǵyly, 5, 31, 36/3; Qoshqarbaev dańǵyly, 26, 39; Kúıshi Dına kóshesi, 46/1, 46/3; Músirepov kóshesi, 9 jáne t.b. boıynsha jumys júrgizile bastady.
Almaty aýdanynda barlyǵy 66 aýla men qoǵamdyq keńistik abattandyrylady, Baıqońyr aýdanynda – 32, Saryarqa aýdanynda – 30. Abattandyrý kezinde kógaldandyrýǵa erekshe kóńil bólinedi», - dep jazǵan ákim.
