Elordanyń negizgi kóshelerindegi úıler birneshe saǵatqa sýsyz qaldy
ASTANA. 18 naýryz. QazAqparat - Beısenbi kúni túnde nasostyq-fıltrlik stansanyń dıametri 400 mm-lik qoǵaltqyshynyń aqaýly bolýy saldarynan Astananyń negizgi kóshelerinde ornalasqan úılerdi sýmen jabdyqtaý júıesi ajyratyldy.
Bul aqparatty QR TJM baspasóz qyzmeti taratyp otyr.
Atap aıtqanda, Imanov, Kenesary, Fýrmanov, Seıfýllın, Ýálıhanov kóshelerindegi, Abaı, Respýblıka, Bógenbaı batyr dańǵyldaryndaǵy jáne «Molodejnyı» shaǵyn aýdanyndaǵy úıler birneshe saǵatqa sýsyz qaldy. Degenmen tańǵy saǵat 3-te sýmen jabdyqtaý júıesi tolyǵymen qalpyna keltirildi.
Tótenshe jaǵdaıdyń aldyn alýǵa «Astana sý arnasy» MKK-niń 10 mamany men 3 tehnıkasy jumyldyryldy.
