Elordanyń memlekettik qyzmetkerleri júrek-qan tamyrlary men qant dıabeti boıynsha skrınıngti zertteýlerden ótýde
ASTANA. 14 sáýir. QazAqparat /Kenjekeı Toqtamurat/ - Astananyń memlekettik qyzmetkerleri júrek-qan tamyrlary men qant dıabeti boıynsha skrınıngti zertteýlerden ótip jatyr.
Búgin Almaty aýdandyq ákimdiginde memlekettik qyzmetkerlerdi skrınıngti zertteýden ótkizý boıynsha ótip jatqan «Ashyq esik kúni» barysynda Salaýatty ómir saltyn qalyptastyrý ortalyǵynyń bólim bastyǵy Janat Sársenbaev Astanada jumysshylardyń negizgi bóligin memlekettik qyzmetkerler quraıtyndyqtan, olardyń densaýlyǵyn saqtaý, medıtsınalyq aldyn ala qaralýdan ótkizý negizgi mindet ekendigin aıtty.
«Densaýlyq saqtaý basqarmasy jáne Salaýatty ómir saltyn qalyptastyrý ortalyǵynyń uıytqy bolýymen Astana qalasynyń memlekettik qyzmetkerleri arasynda júrek-qan tamyrlary men qant dıabetiniń aldyn alý úshin skrınıngti zertteýler ótkizilý uıǵarylyp otyr. Eki kúnge sozylatyn shara aıasynda tekserýler elordadaǵy 8 mekemede, atap aıtsaq, 3 aýdandyq ákimdikte, qalalyq prokýratýra, keden baqylaý qyzmeti, qalalyq sot, ádilet departamentinde, jol polıtsııa basqarmasy men qalalyq salyq departamentinde ótip jatyr», - dedi J.Sársenbaev.
J.Sársenbaev atap kórsetkendeı, júrek-qan tamyrlary aýrýynyń negizgi sebebi adamnyń az qozǵalýy, durys tamaqtanbaýy men kúıgelektikten bolady. Astana qalasy turǵyndarynyń arasynda burynǵydaı, ekonomıkaǵa aıtarlyqtaı nuqsan keltiretin jáne ómir uzaqtyǵyn qysqartatyn áleýmettik negizdegi aýrýlar kóp kezdesedi.
Uıymdastyrýshylardyń aıtýynsha, skrınıngti zertteýler Astana qalasynyń emhanalarynda, perzenthanalar men onkologııalyq ortalyqtarda jıi ótkizilip turady.
Aktsııanyń maqsaty Elbasynyń Qazaqstan halqyna arnaǵan «Bolashaqtyń irgesin birge qalaımyz!» atty Joldaýy men Qazaqstan Rspýblıkasynyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn iske asyrý, sondaı-aq halyqty aldyn ala medıtsınalyq qaralýdan ótý qajettiligi týraly, júrek-qan tamyrlary, qant dıabeti aýrýlaryn aldyn alý ádisteri týraly aqparattandyrý bolyp tabylady.
Aktsııa joǵaryda atalyp ótken memekelerde 15 sáýirge deıin jalǵasady.
