Elordanyń mektep oqýshylaryna jolaqy jeńildigi taǵy da uzartylýy múmkin
ASTANA. QazAqparat - «Astana LRT» kompanııasy qalalyq qoǵamdyq kólikterde oqýshylarǵa arnalǵan jolaqysyn 40 teńge kóleminde tóleý ýaqytynyń uzartylýy múmkin ekendigin aıtty, dep habarlaıdy QazAqparat tilshisi.
«Tasymaldaýshylardyń sheshimimen 1 qazanǵa deıin uzartylǵan bolatyn. Degenmen, bul másele taǵy bir márte qaralmaq. Sebebi, 161 myń oqýshyǵa 130 myń mektepke arnalǵan jol júrý bıleti berilgen. Onyń ishinde 22 myń birinshi synyp oqýshysynyń 7 myńnan astamy ǵana alǵan. Bul másele tóńireginde dúrbeleń týmaýy úshin ony únemi baqylaýǵa alyp otyrmyz jáne 1 qazanǵa deıin ýaqyt berilgen. Taıaý ýaqytta naqtylaıtyn bolamyz jáne merzim uzartylýy da yqtımal», - dedi - «Astana LRT» JShS basqarmasy tóraǵasynyń orynbasary Beıbit Esjanov elorda ákimdiginde ótken baspasóz máslıhatynda.
Eske sala ketsek, buǵan deıin de elordada oqýshylarǵa qoǵamdyq kólikterde júrý aqysyn qolma-qol 40 teńgeden tóleý 15 qyrkúıekke deıin uzartylǵan bolatyn. Alaıda, barlyq oqýshylardyń birdeı jol júrýge arnalǵan karta almaýyna baılanysty qoǵamdyq kóliktiń jol aqysyna jeńildik 1 qazanǵa deıin uzartylǵan edi.
