Elordanyń medıtsına mekemeleri jańa qurylǵylarmen qamtamasyz etildi
NUR-SULTAN. QazAqparat – Nur-Sultandaǵy medıtsınalyq uıymdar koronavırýs pen pnevmonııany emdeýge qajet qosymsha jabdyqtarmen qamtamasyz etildi, dep habarlaıdy QazAqparat elorda ákimdiginiń baspasóz qyzmetine silteme jasap.
Baspasóz málimetterine qaraǵanda, búgin qala ákiminiń orynbasary Baqtııar Máken birqatar uıymdarda bolyp, kúzgi maýsymdyq aýrýlar – JRVI men tumaýdyń kóbeıýin eskere otyryp, mekemelerdiń COVID-19 indetine daıyndyǵyn tekserdi.
Osylaısha, 50-den astam jasandy tynys alý apparaty, 2 kompıýterlik tomograf, ókpeniń zaqymdaný paıyzyn kórýge múmkindik beretin 7 sandyq rentgen júıesi, 3 ottegi rezervýary qosymsha satyp alyndy. Sonymen qatar qalanyń emdeý mekemelerine 500-den astam ottegi kontsentratory, 250-ge jýyq jasandy jeldetý tynys alý apparaty, 300-ge jýyq floýmetr, 500 kópfýnktsıonaldy arnaıy kereýet jetkizildi. Sondaı-aq 1600-ge jýyq ottegi núktesi bar.
«Demalys kúnderi karantın sharalaryn engizýdiń arqasynda qalada COVID-19-ǵa qatysty ahýal turaqtaldy. Medıtsına mekemeleri men qyzmetkerlerge aýyrtpalyq túspeý úshin, qatań sanıtarııalyq normalardy saqtaýdy jalǵastyrý qajet. Koronavırýspen kúreske daıyndyq toqtaǵan emes. 110 tonnadan astam dári-dármek satyp alynyp, mekemeler medıtsınalyq jabdyqtarmen qamtamasyz etilýde. Kúzde órshıtin JRVI indetimen birge koronavırýsqa qatysty ahýal da kúrdelenýi múmkin. Sondyqtan bizdiń barlyq medıtsına uıymdary daıyn.
Jaqynda medıtsınalyq jabdyqtardan basqa jyljymaly flıýorografııalyq keshender, sandyq rentgen júıeleri jáne joǵary dáldiktegi jeldetkishter de keledi. Mysaly, búginde statsıonarlardy ókpeni jasandy jeldetý apparatymen qamtamasyz etý shamamen 94%-dy quraıdy», – dedi qala ákiminiń orynbasary Baqtııar Máken.
Baqtııar Máken ákimdik jeke jáne respýblıkalyq klınıkalarmen olardyń kompıýterlik tomografııa apparattaryn qala emhanalary men statsıonarlaryna bekitý týraly kelisimge qol qoıǵanyn atap ótti. Kompıýterlik tomograftardyń jalpy sany – 19. Qajet bolsa, qalanyń barlyq 17 statsıonary qaıta ashylyp, ınfektsııamen kúreske jumyldyrylatyn bolady.
