Elordanyń medıtsına qyzmetkerlerine syıaqy beriledi
NUR-SULTAN. QazAqparat - Búgin elordanyń medıtsına qyzmetkerlerine syıaqy beriledi. Bul týraly Ortalyq kommýnıkatsııalar qyzmetindegi brıfıngte Nur-Sultan qalasy ákiminiń orynbasary Baqtııar Máken aıtty, dep habarlaıdy QazAqparat tilshisi.
«Búginnen bastap barlyq qoǵamdyq kólikter, kásipordar men memlekettik mekemeler jumystaryn ýaqytsha toqtatty. Tótenshe jaǵdaılar jónindegi memlekettik komıssııanyń bul sheshimi qala turǵyndarynyń densaýlyǵyn saqtaý men koronavırýs indetiniń keńinen taralýyna jol bermeý úshin qabyldandy», - dedi ol.
Baqtııar Máken qala ákimdigi tarapynan qolǵa alynǵan sharalarǵa toqtaldy.
«Birinshiden, elordanyń medıtsına qyzmetkerleri úshin tıisti qonaq úıler men kólik berildi. Atap aıtqanda, Nur-Sultan qalasynyń statsıonarlarynda koronavırýs indetin juqtyrǵan nemese juqtyrǵan adamdarmen tikeleı baılanysta bolǵandarmen tikeleı jumys isteıtin medıtsına qyzmetkerleriniń qaýipsizdigi qamtamasyz etildi. Olarǵa jaǵdaı jasaý úshin qonaq úıler bólindi. Qalalyq shtab ystyq tamaqpen qamtamasyz etip, City Transportation Systems kompanııasynyń elýden astam kóligi berildi. Qalanyń emhanalary men aýrýhanalarynda jumys isteıtin medıtsına qyzmetkerleri úshin de tıisti arnaıy kólik uıymdastyrylǵan. Bul qyzmetterdiń barlyǵy tegin»,- dedi qala basshysynyń orynbasary.
Osy oraıda ol QR Prezıdenti Qasym-Jomart Toqaev sanıtarlyq-epıdemıologııalyq salalardaǵy joǵary júkteme jaǵdaıynda jumys isteıtin medıtsına qyzmetkerleri úshin qarjylyq qoldaý paketin bekitkenin eske saldy.
«Sol bastamany qolǵa alyp, búginnen bastap bizdiń barlyq medıtsına mekemelerinde jumys istetin qyzmetkerlerge tıisti syıaqy beriledi. №2 qalalyq emhana táýlik boıy jumys isteıdi. Bul emhana bazasynda JRVI belgileri bar patsıentterdi qabyldaý úshin observatorııalyq emhana uıymdastyryldy. JRVI belgileri bar naýqastardy tek qana №2 qalalyq emhana qabyldaıdy. Emhanada emdelýshilerdiń koronavırýstyq ınfektsııaǵa zerthanalyq-dıagnostıkalyq zertteýler júrgiziledi. Mundaı qıyn kezeńde túsinistikpen qabyldap, medıtsına qyzmetkerleriniń nusqaýlaryn buljytpaı oryndaý qajet dep sanaımyz. Ózderińiz kórip otyrǵandaı, qalany karantınge jaýyp, qoǵamdyq tártipti kúsheıtý álemdik tájirıbe», - dedi Baqtııar Máken.
