Elordanyń mas turǵyny kólik aıdap ketip, jol apatyna tústi

NUR-SULTAN. QazAqparat – Elorda polıtsııasy ózgeniń kóligin aıdap ketip jol apatyn jasaǵan qala turǵynyn qolǵa túsirdi. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.

Vedomstvo málimetinshe, búgin tańǵy saǵat 04:30-da elordanyń polıtsııa qyzmetkerleri mas kúıde «Chevrolet Cobalt» markaly avtomobıldi aıdap ketip, jol-kólik apatyn jasaǵan qala turǵynyn ustady. Kúdikti túngi klýbtan shyqqan kezde otalyp turǵan kólikti kórip aıdap ketken. Zardap shegýshi mashınasyn otaldyryp, birneshe mınýtqa ǵımarattyń ishine kirgen.

«Quqyq buzýshy avtomobıldi aıdap ketkennen keıin Imanov pen Rahymov kósheleriniń qıylysynda jol-kólik apatyn jasap, mınıven mashınasyn soqqan. Kúdikti birden ustaldy, ol 35 jastaǵy qala turǵyny bolyp shyqty. Onyń ortasha deńgeıde alkogolge mas bolǵany anyqtaldy. Bul jaıt medıtsınalyq kýálandyrý nátıjesi kórsetti. Qazirgi ýaqytta QR Qylmystyq kodekstiń 200-babymen sotqa deıingi tergeý júrgizilip jatyr», - dep atap ótedi departamentten.

Sondaı-aq taǵy bir elorda turǵyny polıtsııaǵa júginip, keshe saǵat 22:45-te Pýshkın kóshesi boıyndaǵy úıdiń aýlasynda otalyp turǵan «Daewoo Nexia» kóligin belgisiz bireýdiń aıdap ketkenine shaǵymdanǵan. Polıtsııa qyzmetkerleriniń jedel izdestirý is-sharasy barysynda buryn sottalǵan 29 jastaǵy kúdikti ustaldy. Atalǵan fakti boıynsha da QR Qylmystyq kodekstiń 200-babymen sotqa deıingi tergeý bastaldy.