Elordanyń mas turǵyny birneshe kóliktiń dóńgelegin jaryp ketken
ASTANA. QazAqparat - Elordada ishimdikke masaıyp alyp, birneshe kóliktiń dóńgelegin jaryp ketken er adam ustaldy, dep habarlaıdy QazAqparat tilshisi Astana qalasynyń polıtsııa departamentine silteme jasap.
«Elordalyq polıtseıler izin sýytpaı 22 jastaǵy jigitti ustady. Ol aýlada turǵan avtokólikterdiń dóńgelegin jardy dep kúdikke ilindi», - delingen departamenttiń habarlamasynda.
Buzaqylyq jasaǵannan keıin jigit alysqa kete almapty. Almaty aýdandyq qylmystyq polıtsııa basqarmasynyń qyzmetkerleri kamera arqyly kúdiktiniń izine túsken.
Anyqtalǵandaı, ustalǵan adam óziniń tanysymen ishimdik ishken. Sosyn úıine bara jatyp, sebepsizden sebepsiz jol sheti men turaqta turǵan kólikterdiń dóńgelegin tesip ketken. Bas-aıaǵy 7 avtokóliktiń dóńgelegi jarylǵany belgili bolyp otyr.
«Qazirgi ýaqytta QR Qylmystyq kodeksi 293-babynyń 1-bóligi («Buzaqylyq») boıynsha aldyn ala tergeý amaldary júrgizilip jatyr. Kúdiktiniń buryn jasalǵan basqa qylmystarǵa qatysy bar-joǵyn tekserip jatyrmyz», - delingen vedomstvonyń habarlamasynda.
