Elordanyń mańyna qatynaıtyn avtobýstar qashan jolǵa shyǵatyny belgili boldy
NUR-SULTAN. QazAqparat - Maýsym aıynyń basynda elordanyń qala mańyna qatynaıtyn jolaýshylar avtobýstary jolǵa shyǵýy múmkin. Bul týraly Habar-24 telearnasynyń tikeleı efırinde Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Menińshe, epıdemıologııalyq ahýalǵa baılanysty mamyr aıynyń sońyna deıin bul baǵdarlardy asha qoımaspyz. Árıne, qalamańy baǵdarlarynyń jumysyn tezirek jańartýǵa tyrysyp jatyrmyz»,- dedi elorda ákimi.
Onyń atap ótýinshe, elorda tóńiregindegi Qosshy, Talapker, Qoıandy syndy eldi mekender zańdy turǵyda Aqmola oblysynyń aýmaǵyna kiredi. Alaıda bul eldi mekenderdiń elordaǵa taqaý ornalasqanyn jáne turǵyndarynyń basym kópshiligi Nur-Sultanǵa kelip jumys isteıtindigin eskergendikten karantındik aýmaqqa kirgizilgen.
«Bul máseleni baqylaýda ustap otyrmyz. Ázirshe, mamyr aıynyń sońyna deıin osy rejımde jumys isteımiz. Menińshe, epıdemıologııalyq ahýal dál qazirgideı turaqty bolyp qala beretin bolsaq, onda maýsym aıynyń basynda qalamańy baǵdarlaryn iske qosamyz», - dedi Altaı Kólginov.
