Elordanyń Máńgilik el dańǵylynda kólik keptelisi qashan azaıady
ASTANA. QazAqparat – Astanalyqtar Máńgilik dańǵylyndaǵy kólik keptelisine jıi shaǵymdanady. Ásirese tańerteń jáne keshki ýaqytta jaǵdaı qıyndaıdy. Atalǵan máseleniń qalaı sheshiletinin Astana ákimi apparaty basshysynyń mindetin atqarýshy Nurlan Álimjanov aıtyp berdi, dep habarlaıdy QazAqparat tilshisi.
«Halyq qozǵalysynyń negizgi baǵyty «oń jaǵalaý - sol jaǵalaý» qaǵıdaty boıynsha qalyptasqan. Elordada Esil ózeni arqyly kópir salý osy baǵyt boıynsha qalanyń negizgi magıstraldaryna, atap aıtqanda, Máńgilik el dańǵylyna, Turan dańǵylyna, Qabanbaı batyr dańǵylyna kólik júktemesin azaıtýǵa múmkindik beredi. Táýelsizdik dańǵylyndaǵy kópirdi paıdalanýǵa bergennen keıin Máńgilik el dańǵylyndaǵy júkteme 10%-ǵa tómendeıdi dep boljanyp otyr», - dep jaýap berdi Nurlan Álimjanov QazAqparat agenttigi joldaǵan resmı saýalǵa.
Sondaı-aq, onyń jalǵasy retinde Uly dala dańǵylynyń batys baǵytynda, Aıtmatov kóshesimen baılanystyrý mańyzdy.
Bul Turan dańǵylyndaǵy júktemeni azaıtýǵa múmkindik beredi.
Spıker atap ótkendeı, atalǵan shara jeńil jáne júk kólikteri úshin qalany aınalyp ótetin tranzıttik qozǵalys úshin kólik dálizin qamtamasyz etedi.
