Elordanyń qylmys jıi bolatyn kóńil kóterý oryndary anyqtaldy
NUR-SULTAN. QazAqparat - 2018 jyly quqyq qorǵaý organdaryna elordadaǵy kóńil kóterý oryndaryndaǵy tóbeles pen buzaqylyqqa qatysy 13,5 myń habarlama túsken. Bul týraly búgin Nur-Sultan qalalyq jergilikti polıtsııa qyzmeti basqarmasynyń bastyǵy Tahır Ábdirahmanov aıtty, dep habarlaıdy QazAqparat tilshisi.
«Aǵymdaǵy jyldyń basynan beri Nur-Sultan qalalyq polıtsııa organdaryna kóńil kóterý oryndaryndaǵy qylmys pen qoǵamdyq tártipti buzýshylyqqa qatysy azamattardan 3,5 myńnan astam habarlama kelip tústi», - dedi ol Nur-Sultan qalalyq kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Jalpy, onyń dereginshe, 2018 jyly quqyq qorǵaý organdaryna azamattardan 13,5 myń habarlama túsken.
«Saraptama buzaqylyq, jappaı tóbeles, denege jaraqat salý, urlyq jáne ózge de quqyq buzýshylyqtardyń Almaty aýdanynda kóp tirkeletindigin kórsetti. Mundaı 784 habrlama kelip túsken edi. Quqyq buzýshylyq jıi oryn alatyn kóńil kóterý oryndary mynalar: «Ryba moeı mechty» karaoke barynan - 76, «Paragon» kafesinen - 60, «Gýdbardan» - 53 habarlama», - dedi ol.
Basqarma basshysynyń aıtýynsha, Saryarqa aýdanynan jyl basynan beri mundaı 647 habarlama «Hıty HH - veka», «Ystanbul», «Qazaqsha dıskoteka» syndy kóńil kóterý oryndaryn túsken.
«Baıqońyr aýdanynda «Shymkent», «Charlı Chaplın» meıramhanalarynan 466 habarlama aldyq. Esil aýdanynda «Pýnkt P», «Zoloto», «EscoBar» syndy kóńil kóterý oryndarynan 356 habarlama boldy. Sonymen qatar, osy jyldyń basynan beri qalanyń kóńil kóterý oryndarynda qarý qoldanýǵa qatysty 9 habarlama boldy», - dedi Tahır Ábdirahmanov.
