Elordanyń qurylys kompanııalary zań talaptaryn eskermeıdi – Birjan Nurymbetov
NUR-SULTAN. QazAqparat - Nur-Sultan qalasynyń eki qurylys kompanııasyndaǵy jalaqy boıynsha bereshek 265 mıllıon teńgeni quraıdy. Bul týraly QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.
«Negizgi problema - jalaqynyń ýaqtyly tólenbeýi. Qazirgi ýaqytta respýblıkanyń jumys istep turǵan 39 kásipornynda jalaqy boıynsha merzimi ótken bereshek somasy 1,8 myń jumyskerge 683 mıllıon teńgeni quraıdy. Elordada zań talaptaryn eskermeıtin jáne 2 aıdan astam ýaqyt jumysshylaryna jalaqy tólemeıtin kásiporyn basshylary da kezdesedi. Bul, eń aldymen, «Shar-Qurylys» jáne «DjıElBı» JShS, jalpy qaryzy 265 mln. teńge», – dedi Birjan Nurymbetov elordanyń jekelegen kásiporyndaryndaǵy eńbek qatynastarynyń problemalyq máselelerine arnalǵan keńes barysynda.
Sonymen qatar, onyń aıtýynsha, jalaqyny uzaq ýaqytqa keshiktirý faktileri «Mostostroıtelnyı otrıad – 25 ım. Rıazanova» JShS-da kóptegen janjaldyń sebebi bolyp otyr. Búgingi tańda respýblıkadaǵy bul kompanııanyń jalpy bereshegi 30 mıllıon teńgeden asady. Onyń 5 mıllıon teńgesi Nur-Sultan qalasynda áli tólenbegen. Al jumyskerler osy jyldyń qyrkúıeginde taǵy da narazylyq mıtıngisin uıymdastyrdy.
«Kelesi problemalyq másele – bankrotqa ushyraǵan kásiporyndardaǵy jalaqy boıynsha bereshek. Respýblıka boıynsha 86 kásiporynda 2,3 myń jumyskerdiń aldyndaǵy qaryz 983 mıllıon teńgeni quraıdy. Onyń ishinde Nur-Sultan qalasyndaǵy 4 bankrottyq kásiporynnyń 9,4 mln teńge bereshegi bar», – dedi mınıstr.
Birjan Nurymbetov qoǵamdaǵy áleýmettik shıelenistiń aldyn alýǵa da nazar aýdardy.
«Jyl basynan beri respýblıkada eńbek janjaldarynyń 3 faktisi tirkeldi. «Abý-Dabı Plaza» qurylys kesheni qurylystaǵy qazaqstandyq jáne sheteldik jumysshylardyń arasyndaǵy únemi týyndaǵan qaqtyǵystardyń turaqty shıelenis kózi bolyp otyr. Tek osy jyldyń ózinde atalǵan mekemede 4 janjal oryn alǵan. Biraq olar turmystyq jáne ultaralyq sıpatta boldy. Olardyń sebebi jergilikti jáne sheteldik qyzmetkerlerdiń eńbek jaǵdaıynyń ártúrli bolýynda», – dedi mınıstr.
Sondaı-aq, ol QR Eńbek jáne halyqty áleýmettik qorǵaý mınıstrligi Bas prokýratýramen birlesip sheteldik jumys kúshin tartatyn 63 kásiporynda (tekserý júrgizýge) bastamashylyq etkenin atap ótti. 38 kásiporynda tekserý aıaqtaldy, onyń ishinde 19-da eńbekaqy tóleýdegi sáıkessizdiktiń 161 faktisi anyqtaldy.
«Tekserý nátıjeleri kórsetkendeı, Nur Sultan qalasynda Arabtec CCL fılıalynda jergilikti jáne sheteldik jumyskerlerdi tamaqtandyrý kezinde teńsiz jaǵdaılar faktileri anyqtaldy. Jataqhanada turatyn sheteldik jumyskerlerge kúnine 3 ret as beriledi, onyń quny 2-den 3 myń teńgege deıin, al jergilikti qyzmetkerler bólek tamaqtanady. Olarǵa tek 800 teńge mólsherinde ótemaqylyq tólem beriledi. Sonymen qatar, jumys berýshilerdiń berilgen ruqsatqa sáıkes kelmeıtin laýazymdarǵa sheteldik jumyskerlerdi tartý faktileri, sondaı-aq qazaqstandyq kadrlardy qamtý talaptarynyń saqtalmaý faktileri anyqtaldy. Tekserý nátıjeleri boıynsha memlekettik eńbek ınspektorlary tarapynan nusqama berildi», – dedi B.Nurymbetov.
Mınıstr sheteldik jumys kúshine baılanysty buzýshylyqtardyń turaqty anyqtalýyna baılanysty QR Eńbek mınıstrligi kvotalardy qysqartý boıynsha sharalar qabyldap, sheteldik mamandardy tartýǵa ruqsat berý erejesin kúsheıtýdi josparlap otyrǵanyn atap ótti.
