Elordanyń qurylys kásiporyndary byltyr 1 mln. 292 myń sharshy metr turǵyn úı qoryn paıdalanýǵa berdi

Onyń ishinde Almaty aýdanynda 607 myń 119 sharshy metr turǵyn úı salyndy. Bul elordada paıdalanýǵa berilgen turǵyn úıler sanynyń 47 paıyzy, dep habarlandy Astana ákimdiginiń saıtynan.

Astana qalasy Almaty aýdany ákimdiginiń málimetine sáıkes, ótken jyly jalpy 9 kóp páterli turǵyn úı kesheni iske qosylyp, 28 kópqabatty turǵyn úıdiń qurylysy júrgizilgen. Sonymen qatar «Myńjyldyq alleıasy» aýmaǵynda ákimshilik, turǵyn úı jáne qonaq úı keshenderin jobalaý men salý úshin 41 jer ýchaskesi bólindi. Jobada 3,5 mln. sharshy metr turǵyn úı salý kózdelgen. Atalǵan úıler ulttyq, azııalyq jáne eýrazııalyq stılde salynady. Almaty aýdanynda 2002-2012 jyl aralyǵynda paıdalanýǵa berilgen jalpy turǵyn úı qorynyń kólemi 6 mln. sharshy metrden astam. «2012 jyly B. Momyshuly dańǵyly men Táýelsizdik dańǵylynyń qıylysynda 1200 oryndyq №70 orta mektep, Kúıgenjar turǵyn úı alabynda 400 oryndyq mektep, kúnine 250 adam qabyldaıtyn emhana men 350 tósektik kópsalaly №1 qalalyq aýrýhana, №2 qalalyq balalar aýrýhanasy, №6 ambýlatorııalyq-emhana kesheni, «Aqbota» saýda úıi jáne «Arýjan» saýda ortalyǵy paıdalanýǵa berildi», - delingen habarlamada.