Elordanyń kóshesine parsy aqyny Rýdakıdiń esimi berildi
ASTANA. QazAqparat - Máslıhattyń kezekten tys sessııasynda depýtattar №179 kósheniń ataýyn aýystyrý usynysyn biraýyzdan qoldady, dep habarlaıdy QazAqparat Elorda Infoǵa silteme jasap.
«Astana ákimdiginiń onomastıkalyq komıssııasyna QR Syrtqy ister mınıstrliginen elorda kósheleriniń birine parsy ǵalymy Ábý Abdallah Rýdakıdiń esimin berý týraly hat tústi. Bul eki memlekettiń (Qazaqstan men Tájikstan - avtor) dostyq qarym-qatynasyn nyǵaıtýǵa múmkindik beredi. Aıta keteıik, Tájikstan astanasy - Dýshanbede qazaqtyń ǵulama oıshyly Abaıdyń atynda kóshe bar. Ol - Dýshanbeniń ortalyq bóliginde ornalasqan», - dedi máslıhat sessııasynda Astana qalalyq Tilderdi damytý basqarmasynyń basshysy Tileýǵalı Qyshqashbaev.
Onyń aıtýynsha, elorda kósheleriniń birine Rýdakı esimin berý Astananyń onomastıkalyq komıssııasy men QR úkimeti janyndaǵy respýblıkalyq onomastıkalyq komıssııanyń otyrystarynda qaraldy.
«Astana ákimdigi Almaty aýdanynda ornalasqan №179 kósheniń ataýyn ózgertýdi usynyp otyr. Ol - B.Maılın kóshesinen bastalyp, B.Momyshuly kóshesine deıin jalǵasady. Munda №51 mektep-gımnazııasy, №6 qalalyq emhana, ákimshilik ǵımarattar men turǵyn nysandary ornalasqan», - dedi basqarma basshysy.
Máslıhat depýtattary bul usynysty biraýyzdan qoldap, osylaısha №179 kóshege Ábý Abdallah Rýdakı esimi berildi.
