Elordanyń kóshe kameralaryndaǵy kórinisterdi tekserý jeńildetildi
NUR-SULTAN. QazAqparat - Elordadaǵy beınekameralarda 3,7 myń tártip buzý oqıǵasy tirkelgen, dep habarlaıdy QazAqparat tilshisi.
Ulttyq akademııalyq kitaphanada ýákiletti organ janyndaǵy úkimettik emes uıymdarmen ózara is-qımyl jónindegi úılestirý keńesiniń kezekti otyrysy ótti. «iKomek» qalalyq monıtorıng jáne jedel áreket etý ortalyǵynyń basshysy Janat Dúbirovanyń aıtýynsha, 6 aıdyń ishinde kameraǵa túsken keleńsiz kórinister sany byltyrǵy 12 aıdyń kórsetkishine jaqyndaǵan.
«Qaladaǵy barlyq beınebaqylaý kameralaryn bir ortalyqqa biriktirdik. Qazirdiń ózinde 8 myń kamera ortalyqtandyryldy. Ondaǵy aqparatty quqyq qorǵaý organdary da paıdalana alady. Kamera derekteriniń sıpatyna kelsek, kóbinese mas kúıde kóshede júrý, shylym tuqylyn jolǵa tastaý, kólikti nemquraıly qoıý, tóbeles sııaqty keleńsiz kórinister kóp túsedi. 2018 jyly kameralarǵa túsken keleńsizdikterdiń sany 4 myńnan assa, bıyl jarty jyldyń ózinde 3,7 myń keleńsizdik tirkelgen», - deıdi Janat Dúbirova.
Ortalyq basshysy baqylaý kameralarynyń bir ortalyqqa biriktirilýi onyń kómegine júgingisi kelgen turǵyndardyń jumysyn jeńildetkennin aıtady.
«Halyq úshin baılanystyń birneshe túrin jolǵa qoıdyq. Buryn kameradaǵy derekti kórý úshin keńsege baryp, ótinish jazý qajet edi. Al qazir 109 nómirine qońyraý soqsa jetip jatyr. WhatsApp nemese Telegram chat-bottary arqyly qajet derekke suraý salýǵa bolady. Osyndaı baılanystyń arqasynda áleýmettik jeli arqyly keleńsizdikterge nazar aýdaratyn turǵyndar sany artyp keledi. Byltyr atalmysh áleýmettik jeliler arqyly ǵana turǵyndardan 90 myń ótinish túsken bolatyn», - deıdi ol.
