Elordanyń kórikti jerleri aqshyl kók túspen jaryqtandyrylady
ASTANA. QazAqparat - Astanada «Báıterek» monýmenti, «Han Shatyr» saýda, oıyn-saýyq ortalyǵy, «Saryarqa», «M 2» kópiri aqshyl kók túske boıalady, dep habarlaıdy elorda ákimdiginiń baspasóz qyzmetinen.
Jyl saıyn 17 qarashada búkil álemde Halyqaralyq shala týǵan balalar kúni atap ótiledi. Osy kúni halyqty merziminen buryn bosaný týraly aqparattandyrý jáne merziminen buryn týǵan sábılerdiń qajettilikterine nazar aýdarý maqsatynda sáýlet qurylystaryn jaryqtandyrý aktsııalary ótedi.
Osy kúni, sondaı-aq, Nıý-Iorktegi Empaır-steıt-bıldıng jáne Ystambuldaǵy Bosfor kópiri aqshyl kók túspen jaryqtandyrylady, al kóptegen tanymal tulǵalar aqshyl kók tústi kıim kıip shyǵady.
Eske salsaq, búgingi kúni elordala 466 tósek orynǵa eseptelgen úsh perınataldy ortalyq jáne 45 tósek orynǵa eseptelgen University Medical Center korporatıvtik qorynyń fılıaly Ana men bala Ulttyq ǵylymı ortalyǵy jumys isteıdi. Atalǵan mekemelerde elordalyq jáne aımaqtardan kelgen júkti áıelderge, bosanǵandarǵa jáne jańa týǵan nárestelerge bilikti medıtsınalyq kómek kórsetiledi.
Bosanatyn áıelderge dárigerlik járdem berý sharalaryn kúsheıtý sharalary belsendi túrde júrgizilýde, qala ákimdigi sońǵy bes jylda 1300 qural-jabdyq pen sanıtarlyq kólikter satyp alǵan.
