Elordanyń kópqabatty úıleri eki kún boıy ystyq sýsyz qalmaq
ASTANA. 6 maýsym. QazAqparat - Kelesi aptada Astananyń birneshe turǵyn úılerinde ystyq sý toqtatylatyn bolady.
Bul jaıynda astana.kz saıtyna «Jylýtranzıt» AQ-dan habarlady.
«2013 jyldyń 11-12 maýsym kúnderi jylý magıstraldaryndaǵy daıyndyq pen tyǵyzdyqty synap kórý maqsatynda elordanyń keıbir úılerinde ystyq sý toqtatylady»,- dep habarlady kásiporynnyń baspasóz qyzmetinen.
Ystyq sý qyzmeti Abylaıhan dańǵyly, Jansúgirov, Qajymuqan, Táshenov, Kravtsov, Taha Hýseın, Baraev kósheleri, Esil, Maqyn, Aqkent, Astrahan, Balqash syndy qysqa kósheler, Turan dańǵyly, Aqyn Sara, Aqjúnis, Tumar hanym, Aıǵanym, Juban ana, Láıli Májnún, Domalaq ana, Aıagóz, Saryarqa, Qalqaman, Ǵaryshkerler kósheleri, Qabanbaı batyr dańǵyly, Qorǵaljyń tas joly, Alataý shaǵyn aýdany, Ýálıhanov, Tarhan, Asan qaıǵy, Imanov, Beısekbaev, Kenesary kóshelerinde toqtatylady.
«Astana- Jylýtranzıt» PIK jáne PK ókilderi, uıymdar men kásiporyndardyń jetekshileri ystyq sý jabdyqtaryn júıeden aǵytyp, kezekshilik uıymdastyrý qajet ekendikterin atap ótedi.
