Elordanyń kópbeıindi №1 aýrýhanasy shtattyq jumysyna kiristi
NUR-SULTAN. QazAqparat - Nur-Sultan qalalyq kópbeıindi №1 aýrýhanasy shtattyq jumys rejımine kóshti. Óıtkeni, búgin osy aýrýhanada ashylǵan statsıonardan koronavırýs indetin juqtyrǵan sońǵy patsıent emdelip shyqqan edi, dep habarlaıdy QazAqparat tilshisi.
«Búgin ókpeniń ekijaqty qabynýymen túsken sońǵy patsıent jazylyp shyqty. Ózin jaqsy sezinedi. Táýlik boıy qyzmet kórsetken qyzmetkerlerimizge jáne ujymymyzǵa rızashylyǵyn bildirip otyr. Júkteme óte úlken boldy. Soǵan qaramastan, barlyǵy da judyryqtaı jumylǵan ujym bola bildi. Búginnen bastap statsıonarymyz shtattyq rejımde jumys isteýge kóshti. Statsıonardyń barlyq qyzmetkeri aldyn ala tekserýden (koronavırýsqa test - red) ótti. Baqytymyzǵa oraı, nátıjeleri teris bolyp shyqty», - dedi atalǵan aýrýhana bas dırektorynyń mindetin atqarýshy Marat Ábdýov.
Sonymen qatar ol koronavırýs ınfektsııasynyń ekinshi tolqyny oryn alǵan jaǵdaıda statsıonar kez-kelgen ýaqytta ınfektsııalyq rejımde jumys isteýge daıyn ekendigin basa aıtty.
«Jasandy tynys alý apparatyna qatysty esh problema bolǵan emes. Dári-dármek tapshylyǵyn da aıtarlyqtaı baıqaı qoıǵan joqpyz. Shilde aıynda Reseıden mamandar kelip, mol tájirıbelerimen bólisip ketti. Olarmen barlyq máselelerdi jiti talqyladyq», - dedi ol.
