Elordanyń kommýnaldyq qyzmeti kúsheıtilgen jumys rejimine kóshti

ASTANA. QazAqparat - Astanada qar jaýyp, kóktaıǵaq bolýyna baılanysty qalalyq kommýnaldyq qyzmetter kúsheıtilgen jumys rejimine aýysty, dep habarlaıdy QazAqparat tilshisi Astana qalalyq ákimdiginiń resmı saıtyna silteme jasap.

«Astanada qar jaýyp, kóktaıǵaq bolýyna baılanysty kósheni tazalaýǵa jáne qolaısyz aýa raıynyń saldaryn joıýǵa 100-den astam arnaıy tehnıka shyǵaryldy. Sonyń ishinde, «Almaty» aýdany boıynsha - 20, «Baıqońyr» aýdany boıynsha - 7, «Esil» aýdany boıynsha - 32 jáne «Saryarqa» aýdany boıynsha - 32 birlik», - delingen ákimdiktiń saıtynda.

Atalǵan kólik túrleriniń ishinde kósheni sypyryp-jınaıtyn mashınalar, trotýarlardy tazalaıtyn tehnıka, qum sebetin, shnekorotor, avtogreıderler men qar tasymaldaıtyn tehnıka, frontaldy tıegish pen júkterdi ózi túsiretin kólikter bar. Budan bólek qardy qolmen tazalaýǵa 213 kommýnaldyq qyzmet jumysshysy tartyldy.

Aıta ketsek, Qazgıdromet respýblıkanyń basym bóliginde qubylmaly aýa-raıy saqtalyp, jaýyn-shashyn bolyp, onyń ishinde Aqmola oblysynda tuman men kóktaıǵaq bolatynyn da eskertken bolatyn.