Elordanyń qoqys óńdeıtin zaýyty qyrkúıektiń ortasynda iske qosylady
ASTANA. 3 maýsym. QazAqparat /Marlan Jıembaı/ - Elordanyń qoqys óńdeıtin zaýyty aǵymdaǵy jylǵy 15 qyrkúıekte iske qosylady. Bul týraly búgin Elbasynyń qatysýymen ótken Astananyń keleshektegi damýy máselesine arnalǵan keńeste qala ákimi Imanǵalı Tasmaǵambetov málim etti.
Qala basshysynyń alǵa tartqan derekterine sáıkes, qurylys 88 paıyzǵa salynyp bitken. Kelesi aptadan bastap qural-jabdyqtardy qurastyrý jumystary qolǵa alynady.
«Eń zııandy qoqystar - plastık paketter men plastmassa buıymdar. Mádenıeti damyǵan qalalarda qaldyqtardy usaqtaıtyn qurylǵylar bar jáne arnaıy ydystar turady. Olardyń birine shyny, kelesisine plastık, úshinshisine temir zattary salynady. Mine, jumysty osydan bastaý kerek, halyqty jaqsy ádetke úıretý qajet», - dep atap ótti Astananyń keleshektegi damýy máselesine arnalǵan búgingi keńeste Memleket basshysy.
